《純愛》平安夜的天使 (完): 第六十八章

第六十八章

「好飽呀～」

「估唔到妳煮嘢又真係幾好食㗎喎～」

食完飯之後，曉桐趴咗喺我個梳化到，一字形咁趴，當足係自己屋企咁⋯

Lavina：「洗乜講，我咁冰雪聰明～」



我：「係喇係喇～知妳叻喇～」我講完呢句佢就繼續趴喺張梳化到喐都唔喐，完全無視咗我呢個主人嘅存在⋯
「喂⋯身為女仔做嘢可唔可以得體啲呢⋯話哂呢到係我屋企⋯」

Lavina:「驚咩啫～都無人喺到～」

我：「我唔係人呀！」真係俾妳激死⋯不過又係多得佢，我先可以重新開始面對過去，面對自己嘅遺憾⋯
「我去洗碗先喇～唔好亂掂我啲嘢呀！」講完我就行咗入廚房

Lavina：「知喇～麻煩友～」



過咗二十分鐘之後

Lavina：「阿遊～有電話搵你～」

我：「哦⋯」我入房攞部電話，見到阿倫打咗好多似電話黎，但我啱啱去咗洗碗，所以接唔到⋯咁既然我聽唔到，唯有打返去囉⋯
「喂，阿倫？咁夜搵我做咩呀？」

倫：「哦，無嘢，想話聲俾你知阿輝同Jody個BB出咗世啫，我哋啱啱見經過你屋企，諗住車埋你同Lavina去探佢哋啫⋯」

我：「吓！咁快！？琴晚仲好哋哋㗎喎⋯Sorry呀⋯啱啱去咗洗碗⋯」



倫：「洗碗？你煮飯黎呀？唔似你喎～」睇黎呢到講大話都無意思，都係照實咁同佢講算⋯

我：「係曉桐過黎煮飯啫⋯」

倫：「哦～佢識煮飯㗎？你就好啦！有安樂茶飯食～」佢仲要突登講到超大聲，真係好想一把車埋去攞佢返面到⋯

我：「你真係博全世界都知咁喎⋯」

倫：「你放心啦～老婆仲係上面同緊Jody傾母經，我都係啱啱偷偷地出黎㗎咋⋯ 而阿輝就⋯唉⋯」睇黎又俾兩個女人夾攻喇⋯辛苦哂⋯
「點呀？你現加係咪後悔呀？」睇黎佢已經聽得出我嘅語氣同平時唔同，帶有啲悔意⋯

我：「我最唔想發生嘅事果然發生，同埋Kelsey仲⋯」我同佢講咗封信嘅事

倫：「咁你諗住點呀？連Kelsey都俾埋通行證俾你喇⋯你⋯係咪要追佢喇⋯」



我：「我都唔知⋯ 但現加我唯一知嘅係，我仲好掛住Kelsey⋯」

倫：「我都好掛住你以前同Kelsey日日喺到耍花槍，仲有我哋4個人一齊分工合作嘅日子⋯」



「人與人之間每一次相遇都係好寶貴，今日見到，唔代表聽日都會見到。所以，有咩就應該講，唔好再拖，唔好俾自己後悔。」