《純愛》平安夜的天使 (完): 第六十七章(曉桐章八)

第六十七章(曉桐章八)

「咁聽日見喇，88～」

「88⋯」

見到阿遊後兩個月，我一直都忙緊Art嗰邊嘅team project，所以都無時間去諗其他嘢⋯ 嗰晚我同班友做完project，見咁啱喺尖沙咀個頭，而阿遊嘅做嗰間cafe又咁啱喺尖沙咀，所以想行去偷睇一眼，一眼就夠⋯

我攞住張卡片，慢慢咁依照上面地址行到cafe外面，但就見唔到阿遊嘅身影⋯



我：「佢唔喺到嘅⋯ 唉⋯ 下次再黎過啦⋯」入面只見到上次喺醫院見到嘅嗰對男女。我好記得嗰日係11月23嘅，天氣開始轉涼，但以前喺紐西蘭凍慣咗，所以同平時著嘅衫差唔多，白T加淺藍牛仔褲，外加一件白色冷衫。

於是我滿懷失望，行到去天星碼頭諗住坐一坐低，諗下之後點算⋯ 正當我喺到沉思嘅時候，見到有個男人坐咗喺鐵欄杆上面，攞住罐啤酒係咁飲，地下仲擺咗一大堆啤酒罐，起初我都冇理，以為係啲阿伯三更半夜喺海邊唱歌。我本諗住行開去第到坐，但行咗一段距離之後，喺好奇心嘅驅使下回頭一望，見到嗰人嘅樣，係阿遊！佢滿面通紅，睇黎已經醉到不省人事，我馬上跑過去佢身後大叫咗一句：「唔好呀！」

佢馬上向後望住我，同我講咗一句：「做咩呀⋯⋯ 我⋯⋯我嘆下海風咋嘛⋯哈哈😅⋯」佢仲同以前一樣，完全唔識講大話。你問我點知？阿遊以前欠功課講嘅「理由」都俾老師篤穿，所以個個都話佢唔識講大話⋯

我：「乜嘆風要飲咁多啤酒㗎咩？」佢睇到之後面有難色，睇黎俾我講中咗⋯

遊：「哈哈⋯咁唉⋯⋯呀⋯對唔住🙏」佢合起咗雙手，導致無手撐住扶杆，之後仆咗落地⋯



—————————————————————

我：「哈哈⋯」

遊：「做咩無啦啦食食下飯喺到笑呀？」

我：「我諗起我第一次見返你時候嗰時由欄杆仆落黎嗰個樣，好好笑⋯」

遊：「啊啊啊！呢段黑歷史唔好再提呀！」



我：「呵呵～我鐘意呀～」

我/遊：「哈哈～」我好希望我可以成為你開心果，令你快樂，分擔你嘅痛苦，就好似你對我一直同我行落去，不求回報咁付出同支持我⋯
••••••••••••••••••••••••••••••••••••••••••••••••



「一個人唔開心嘅時候會好易胡思亂想，但係陰影中獨自走出來嘅，到底有幾多個？」