第九十三章

「哈哈⋯」

過咗一陣,我講完晒我呢三年所經歷過嘅一切,而Kelsey嘅頭輕靠咗喺我膊頭上。我好懷念呢種感覺,呢種清爽中帶住溫暖嘅觸感⋯

我:「好希望我哋可以返返以前,一齊係屋企嘅日子⋯」

Kelsey:「嗰段係我人生中最美好嘅日子⋯可惜⋯我哋永遠都返唔到轉頭⋯」講完呢句之後,佢嘅身體就開始喺一片霧靄中慢慢變透明,化成一道晶亮嘅光,開始隱沒喺朦朧之中。睇黎係時候返去喇⋯



我:「Kelsey⋯」佢企咗起身,背對住我

Kelsey:「你要好好咁睇住曉桐呀!」我聽住佢帶哭腔嘅聲音,呢一把我可能係最後一次聽嘅聲音,卻點都抬唔起頭,因為我唔敢應承佢,我怕,我兌現唔到呢個承諾⋯
「何永遊,我愛你!我永遠愛你!就係因為我愛你,我先唔想你因為我,拋棄自己嘅幸福,我唔想見到你因為我呢個已經唔再喺到嘅人而浪費一生!我最想見到你開心,而唔係守住我一世!應承我,將對我嗰份愛,俾一個比我更好嘅人!」

我終於抬起頭,因為我知道,我雙眼所流嘅淚,唔再係因為歉疚同留戀而流,而係因為愛同成全而流⋯

我:「我會,我應承妳,我一定會!妳要等我,有朝一日,我哋三個一定會再見!」

Kelsey:「好!😊」佢嘅笑容如風般逝去⋯


「我愛你,梁敏晴⋯」

「阿遊⋯」曉桐嘅聲再次喺我身後傳出,但開始漸漸減弱⋯我開始向著嗰把聲嘅方向跑,一直跑、一直跑⋯

「曉桐,等我呀⋯」

「等我呀!曉桐!」

我越接近把聲,周圍亦變得淡黑、灰暗,最後黑暗包圍咗我嘅身體,視線已一片黑暗⋯ 正當我快睇唔到路嘅時候,我嘅右手感到一陣微光,佢照亮咗我要行嘅道路⋯喺遠處,我漸漸見到喺遠方嘅曉桐⋯佢背對住我,佢越行越遠⋯



「曉桐!」

「曉桐⋯」



「多年嘅作繭自縛、自我羈絆,竟然就喺你一句成全之間,悄悄鬆綁⋯」