《純愛》平安夜的天使 (完): 第九十四章

第九十四章

「嗯⋯」

我再次擘大眼時候，我睇到灰白色嘅天花板，我轉頭一望，見到側邊有個手袋，同埋我部電話⋯我嘗試坐起身，但郁都郁唔到⋯個身好重，可能係個人傷咗嘅關係，成個人好似「俾鬼壓」咁款，我用眼慢慢掃視周圍環境，點知⋯

「原來唔係鬼壓人，係阿婆壓病人⋯」原來曉桐⋯曉桐成個頭瞓咗喺我心口位⋯唔怪得郁唔到啦⋯我諗住拎開個氧氣罩，但隻手俾曉桐握到實一實⋯今次真係唔方唔係「鬼壓床」喇⋯

「阿遊⋯」呢個衰婆，真係呢⋯但係見到妳瞓得咁冧，我就安樂晒啦⋯因為我有成功救到妳⋯



「吱～」突然其來嘅開門聲，嚇到我即刻帶返個氧氣罩扮瞓⋯

「曉桐姐～」呢把聲⋯阿Mel？點解佢喺到㗎？唔洗返學咩？

Lavina：「嗯⋯阿Mel？點⋯點解妳黎咗喇？」

Mel：「係呀，今日無堂，所以咪諗住過黎睇一睇阿哥呀⋯佢情況點呀？」估唔到呢個衰妹竟然會咁關心我，平時寸我寸到不似人形，現加對我咁好⋯搞到我好感動呀衰妹！

Lavina：「尋晚過咗危險期，但醫生話唔知佢會幾時醒，可能幾日，可能幾個禮拜⋯」唔洗驚呀曉桐，我醒咗喇！等間好好補償返妳！



Mel：「嗯？」

Lavina：「做咩呀？」

Mel：「哦⋯無嘢呀，係喇，我買多咗份早餐，不如⋯」

Lavina：「Sorry呀，我要返Cafe幫手⋯阿遊都過咗危險期，而且琴日都留咗成日喺醫院，都要返Cafe幫返佢哋，同埋可以順便返屋企沖個涼先再返黎⋯」吓！佢諗住一直留喺到直到我起身呀⋯大鑊⋯

Mel：「咁好啦⋯咁我幫妳睇住先喇⋯88」



Lavina：「88～」佢講完便跑咗出病房，成間房得返我同阿Mel⋯



「喂，佢走咗喇！起身啦咸濕佬！」



「真正放下的時候，就是你承認這一切已是過去的時候。」