可能呢啲就係學生時代初澀嘅感情...: 第五章

平時我哋為咗唔好喺學校交收返嗰陣時畀人傳緋聞，通常都會係朝頭早先交換返。真係希望嗰條友仔唔好唔記得帶本書...如果唔係今日我冇得交就大鑊啦！
通常係朝頭早嗰陣時我都係比較早到。我企喺管理亭嘅瓦遮頭嗰度，好順手咁開無聊開咗個遊戲玩，等住佢落黎。
見住佢孭住個灰色書包，好似平時咁兩手fing fing咁行過黎。
「快啲畀返書嚟啦。」「ok...」
朝頭早唔知係未瞓醒定點，周圍因為好靜，所以總有種尷尬感。
特別係佢搵緊書嗰陣時。
「嗱呢度呀，...落去啦」
我冇講嘢，攞咗本書就擺落書包到。
「嗯，行啦」今次我好少可咁行喺前面，
又總係想擰轉頭，望一望佢係咪同我行同一條路...




喺呢個咁陽光普照嘅朝頭早，果然巴士站嗰度都係成條龍...唯有乖乖哋咁排喺後面。
但無耐性嘅我覺得不如寧願搭地鐵算啦。當我想擰轉頭問佢嗰陣，個天竟然同我開始落雨... 重點我唔記得帶遮...
明明今朝我wts問阿軒嗰陣時，佢又話今日絕對唔會落雨嘅！
唉...
本身只係毛毛雨，我都算啦，但後面突然間「炸」一聲變大雨咗好多。我即刻衝入附近嘅瓦遮頭，當然其他人都係。
「妖書包同條校裙都濕曬啦...」同一時間瓦遮頭入面啲人個個逼住哂，有啲喺度閂遮，有啲唔知做緊乜...
正當我諗住攞紙巾嗰陣時，有個人遞左包紙巾過黎。
「傻仔~你係咪唔記得帶遮呀~」 果然係阿軒。
「你明知我懶得睇天文台先問你，你又呃我！」「唉唔好咁啦」
佢拉咗我出瓦遮頭，開咗把遮，直接放咗喺我手上面。




「一係...我把遮畀你擔啦！」雖然話佢呃我唔啱...但望住佢一手比把遮我，一邊畀雨淋住，我個心都好唔好受...話曬都係好朋友呀嘛。
我拉住佢隻手，將佢扯入遮入面。
「最多一齊遮...？」
佢呆咗咁望住我，好近好近...我塊面開始唔受控制咁熱起黎。
「嗱！...我唔會還返把遮畀你住咁好人㗎！你搞到我冇得遮雨要畀雨淋...但因為我好好人所以先同你一齊遮啫！」
我理直氣壯咁望住佢講，突然間靜咗一下，佢笑起左上嚟。
「我係咪講錯野呀...冇野重黎！其實...」
「唉得啦得啦~你做咩突然覺得自己講錯嘢呀~」
「...咁...我見你喺度笑，我以為我出咗咩醜啫...」
「...你成日都係咁，份人咁自卑...如果有日~我唔喺呢度住或者唔同班咁你點算呀...」




「你唔好亂講嘢呀！如果一旦中咗...」
「無嘢喇，我照會過嚟搵你嘅~你嗰陣時就等住食我嘅wts洗版啦！」
呢個時候巴士嚟啦，好彩啱啱冇去搭地鐵...
原來我地已經傾咗有一段時間。
「咁點呀~係咪一齊遮先？」「okok...」「好唔情願咩？」「邊敢呀...」
我份人就係咁，俾佢好似咁點幾句，就會變番平時懦弱又自卑嘅自己...
但可以喺人面前做返自己，其實都係一件幾舒服嘅事，而佢又受得住我...都係開心嘅。
只怕呢種時光，持續得唔知可以到幾時。