可能呢啲就係學生時代初澀嘅感情...: 第四章

爽手嘅我好快咁上返樓，擺低咗個袋，攞埋本書同埋手機就去公園啦。
一到公園，就見到佢坐喺外圍嘅防火欄上面...仲要一隻腳擺喺防火欄上面，一隻腳放喺下面，「靚仔」到你呢~
「你同我差唔多高啫，落返嚟啦...而家都好高咩？」
「高過你少少咪得囉」「超...」
突然靜咗...佢又唔應返我喎。
我將本書遞向佢，但佢一直都唔拎...我喺佢面前揮咗本書好耐，都係唔理我...我索性直接將本書拍喺佢心口到。
「喂...大佬你唔係要書咩。」
「...呀...你唔好掛住塞本書畀我，講多兩句先啦...咁樣好尷尬㗎嘛。
喺度等你開新話題，你又唔開...」佢突然擰轉頭， 好似個細路做錯嘢咁咁眼尾望黎望去...
「唔係話好十萬火急嘅咩...」嘩大佬佢一嘢啤過嚟...




唉算啦...
「好好好~我開新話題~」
如果佢唔係我好朋友嘅話，我肯定已經打咗佢一餐。
後嚟我哋傾左差唔多半個鐘，佢先話佢阿媽有可能會鬧...於是叫我畀本書佢，就閃左人啦。
七點啦，個天已經差唔多黑曬，
雖然無啦啦俾佢搵落嚟，仲要陪佢傾計...
但...其實都幾開心呀......
(黃子軒視覺)
衝返上樓之後，當然少不免要接受阿媽苦口婆心嘅「教誨」...都係話點解交收嘢要搞咁耐之類嘅嘢啦...
聽完之後，我入廁所洗咗個面，就好似成身軟曬咁橫攤喺床上面瞇埋隻眼「休息」...




冇幾耐之後，我又擘大翻眼，隨手咁開咗開床邊嘅櫃桶...攞咗嗰本同我手上面本身嗰本一模一樣嘅書出嚟。
相信聰明嘅巴打已經知道係咩回事...望住佢嗰本上面印咗學號28號嘅書，心入面...真係開心到你呢。
你個傻仔...點解可以咁好呃㗎，
其實我一早就做完份閱讀報告喇...
而本書呀？
...我根本就帶左返屋企。