是咁的，我嘅職業係幫人瞓覺: 二十二、事實
「我想問，學校見你面試嗰陣，你係咪個心突然有種唔好嘅預感？」
我單刀直入問題嘅核心。
阿俊碌大隻眼，直情好似當我係可以性交轉運嘅神棍咁樣。
「係呀係呀你點知架？跟住我個腦就空白哂，咩都諗唔到咩都講唔到，仲手心呀頸呀依啲位標哂冷汗呀！」
阿俊一路講，一路用手指向出汗嘅地方。
「又話無學校請嘅？」
阿俊紅都面哂，難得建立咗一個「唔係我問題，係無學校請人」嘅假象嚟保住面子，竟然自打嘴巴穿哂煲。
不過喺佢嘅角度睇，我竟然講得中佢面對嘅問題，又真係會忍唔住自爆嘅。
「咁⋯⋯個事實真係好肉酸吖嘛⋯⋯」