是咁的，我嘅職業係幫人瞓覺: 四十一、波板糖

我好似座佛咁坐喺地下，婷婷對我又揼又踢，又推又撞，但都吹我唔漲。

「係喇，點解你咁唔鍾意你主人嘅？」

「我點解要話畀你知呀！」

婷婷背靠我背脊，雙腳出盡力想推走我。

「仲有咪再喺我面前講主人呀！」





「點解？」

「佢唔係我主人！聽到依兩粒字就火滾喇！呢種咁嘅人⋯⋯咁嘅人⋯⋯」

推我嘅力量消失咗，婷婷背靠住我坐喺地上。

「佢呢種咁嘅人⋯⋯嗚⋯⋯哇⋯⋯」

佢竟然無啦啦喊起上嚟。





婷婷同阿婷嘅關係真係搞到我一頭霧水，好少見表意識同潛意識係佢地咁款。

唉，細路女喊，頭都大埋？

「嗱，哥哥請你食波板糖啦，唔好喊。」

「超，枝波板糖明明就我嘅。」