是咁的，我嘅職業係幫人瞓覺: 八十四、YES，I DID

阿婷嘅膊頭起伏幅度微微加大，睇得出佢依一刻個心好亂。

婷婷係只對阿朗負責任嘅良心，佢一直眼白白睇住主人向阿朗講大話，睇住佢一步步傷害自己嘅愛人，但都無能力做任何事阻止。

阿婷拎起手機，緊閉雙唇，眼眶泛紅。

不過婷婷最開始嗰陣，的而且確影響到阿婷嘅行為。

依家，我嘅說話令阿婷嘅表意識再次出現阿朗依個人。





同時婷婷亦用佢最後嘅力量，推動主人做返一次應該做嘅事。

阿婷解鎖咗阿朗。

佢地嘅對話仍然停留喺最後一日。

「Did u cheat on me？」

「No」





如果曾經同一個好親密嘅人鬧翻，就會好大機會試過，有一日，唔知點解會突然之間好想搵返嗰個人。

有啲人會抑壓依種衝動，可能因為自尊心，又可能因為唔甘心。

而阿婷，一直以嚟都係贏嗰個，所以佢根本唔使理會自尊心，亦無咩唔甘心。

只係純粹想搵返嗰個，曾經愛過但自己都唔知嘅人，講返一句應該講嘅說話。

噠噠噠，噠，噠噠噠。





「Yes I did」

噠，噠，噠噠，噠。

「Sorry」

送出。

滴。

阿婷嘅淚水滴落螢幕，就只係一滴。

佢察覺到失態，立即索索鼻水，將阿朗再次封鎖。

我知道，婷婷已經唔再存在。





拜拜喇，大哥哥。