是咁的，我嘅職業係幫人瞓覺: 九十二、人生贏家
對我嚟講，無野重要得過瞓覺，所以我從來無體會過依種為咗要做某啲事而犧牲睡眠時間嘅情況。
再加上我本身就有借瞓覺賺錢嘅能力，根本唔需要多諗依啲無謂野。
如果你問我除咗瞓覺鍾意做乜，我其實答唔出。
如果唔係我咁啱好彩無緣無故有咗幫人瞓覺嘅超能力，你問我會翻咩工，可能我都係答你正苦工。
我話當年畢業嘅時候問過一班同學，而我心入面嘅答案同佢地其實都一樣。
唔講我喇，講返恆仔，佢係典型嘅人生贏家。
除咗知道自己鍾意股票之外，亦喺多年嘅自學同實戰經驗當中磨練自己嘅投資技術，依家炒股有八成機會賺錢。
一個人靠自己有興趣又有能力做嘅工作搵到大錢，嗰種自信係由內而外再由外而內再由內到返外。
我跟住挺起胸膛行走嘅恆仔，佢個男神格同韓劇入面啲哦巴相比有過之而無不及。
沿住啲走廊行去病房，啲姑娘唔理老嘅嫩嘅都左右開弓呀唔係，左右退開，好似見證嘅摩西過紅海嘅奇蹟一樣。
班護士瞪大隻眼，眼珠跟實恆仔慢慢移動，啲生理鹽水流到一地都係。
喺恆仔經過走廊之後，相繼有幾位年紀大嘅護士長受唔住刺激要索白花油。