是咁的，我嘅職業係幫人瞓覺: 九十三、女病人

我由細到大都未試過有人見到我就索白花油，我諗正常人都唔會有咁嘅經驗。

我講得咁清楚明白，大家都應該可以知道恆仔係個幾有魅力嘅男士。

高大威猛靚仔有錢。

本身是但有一樣特質已經溝死女，佢四樣野集於一身，就好似攞你命三千咁清麗脫俗，簡直就係女人眼入面嘅漆黑中的螢火蟲，總係咁鮮豔奪目。

如果女人係飛蛾，恆仔就係火，專職係被蛾撲。





佢自從十六歲開始就未試過身邊無女人，就算無女朋友都會有追求者，或者有純情妹妹暗戀佢。

有錢有女，人生夠完美未？

男人一生在世，衰啲講句都係為咗財色兼收啫，當依兩樣野都滿足咗嘅時候，一個人仲有咩慾望可言？

我跟住恆仔入到病房，私家豪華房，唔去過都唔知同公立醫院病房差咁遠。

所以你話錢幾緊要。





無錢嘅人，買啲好啲嘅藥都唔得，更遑論要住豪華病房。

軟屬嘅純白病床上，醫療機器連接住一個光頭嘅老女人。

佢瘦到面頰凹咗入去，個頭好似舖上薄皮肉嘅骷髏，顏色暗淡無光。

女人嘅嘴微微張開，呼吸發出「嘎嘎」聲，胸口嘅起伏幅度幾乎細到睇唔到咁滯。

一睇就知，係個大限將至嘅人。