是咁的，我嘅職業係幫人瞓覺: 一百零一、記憶錯亂
不過重點係，依家嘅我有「發緊夢」嘅自覺，咁至少可以確認依度唔係現實世界。
雜亂打結嘅記憶之中，有一段模糊嘅影像，雖然唔記得內容，但嗰種感覺係要我幫恆媽瞓覺。
我行去恆媽身邊，準備訂立契約，不過佢仲未醒，連少少回應都畀唔到我，所以暫時未可以咁做。
同時我亦唔可以畀恆仔知道依個世界係夢境。
佢同恆媽只不過係客人潛意識中某一部分扭曲而成嘅人物，由回憶或者自我意識組成，同遊戲嘅npc差唔多，不過唔會重覆講同一句對白咁解。
如果恆仔知道係夢，即係客人都會意識到係夢。
發過夢嘅人都會知，好多時當意識到「啊，我發緊夢」就代表我地差唔多醒。
我確認唔到自己喺第幾層夢中，但肯定唔係第一層，因為我幾乎忘記自己發緊夢。
所以我唔可以驚動恆仔，客人一醒，我會浮到上一層夢境，都係醒唔返。