是咁的，我嘅職業係幫人瞓覺: 一百二十一、旅行
我滑過佢手機上一張又一張壯觀嘅風景相，好似七彩薄紗嘅極光、純白配深藍嘅冰川、飄雪嘅山頂、一望無際嘅沙漠、天海連成一線嘅天空之鏡、無限延伸嘅鳥居、貼咗個膠神喺正中嘅天安門廣場、好似三角朱古力嘅金字塔、飛流直下三千尺嘅瀑布⋯⋯
「你自己一個去？」
「唔係會有邊個同我去？」
「呃⋯⋯我估女啩？我成日覺得旅行嘅重點唔係去邊度，而係同邊個一齊去。」
「總有啲旅行，淨係適合自己去。」
恆仔話，隨便搵個女仔陪佢去一啲都唔難，但佢一開始就已經決定咗依個旅行，只會屬於佢自己，同恆媽。
「同伯母？」