是咁的，我嘅職業係幫人瞓覺: 一百三十五、現實同夢境
近日我開始得閒無聊喺度諗啲哲學問題。
尤其係幫人瞓覺瞓得多之後，有時我會諗下莊子諗過嘅問題。
到底係莊周夢蝶？定係蝶夢莊周？
到底《潛行凶間》入面，最後一幕個陀螺會唔會停？
或者成套戲從頭到尾，李安納度都只係脫離咗好多個夢中夢中夢中夢，但實際上佢都仲喺一個夢入面呢？
無錯有人話，喂佢啲仔女擰個頭過嚟，之前見唔到佢地個樣，最後見面到喎，仲唔係現實？
但又邊個話見到仔女擰轉頭個樣就代表真實？
成套戲唯一可以客觀咁令人分辨現實同夢境嘅物件就只有圖騰，有人係粒骰，有人係一隻棋，主角嗰個就係陀螺。
喺唔知陀螺會唔會真係停之前，其實無人知嗰一幕到底係現實定夢境。