是咁的，我嘅職業係幫人瞓覺: 一百三十四、跨越

眼皮打開，見到熟悉嘅天花。

但我再次合埋眼，試圖回憶返啱啱嘅夢境。

「跨越咗⋯⋯」

喺幫恆仔瞓覺嘅時候，我喺夢中睇咗佢嘅願望幾萬次，於是令我日後久唔久都會發咁上下嘅夢。

但係恆仔當時嘅願望一個都無實現到，所以夢境永遠停留喺幻想破滅嘅一刻。





而我所夢見嘅都一樣，唔理發幾多次夢，去到最後恆媽都唔會願意畀我幫佢瞓覺，佢亦唔會記得恆仔或者同到佢講任何說話。

今次，係咁耐以嚟第一次，個夢跨越咗幻想破滅嘅一刻。

我知恆仔已經接受咗恆媽離世嘅事實，所以都唔需要再特登同佢講我發咗個關於佢嘅夢。

純粹係我覺得自己好似釋懷咗，至少今次瞓醒無再一額汗。

廳外傳入飯香，仲有煎緊野嘅熱油彈跳聲。





我撐起身，用燒紅嘅針拮下自己手背，血珠滲出，確定痛楚嘅感覺。

起身先發現原來我掛住咗恆仔送嘅捕夢器一齊瞓覺⋯⋯我有掛喺心口咩？

話說，喺夢入面我都帶住佢⋯⋯該燴囉！我仲話係女朋友送！唔怪得想反胃啦。

我拎起捕夢器睇下前，又睇下後，我啱啱發嘅夢雖然平時係會嚇醒我嘅惡夢，但今次又真係唔算惡夢喎，睇嚟依嚿野真係幾靈。




























當時嘅我，無留意到象徵「奇蹟」嘅種子，原來已經少咗一粒。