是咁的，我嘅職業係幫人瞓覺: 一百三十九、另一套系統
夢中夢係因為我休息唔夠，所以喺夢入面瞓著咗。
依種情況我係發緊自己嘅夢，只要喺夢入面搵啲物件嚇醒自己就得。
人嘅恐懼往往都已經喺潛意識深深植咗根，所以我一定可以喺夢中搵到可以嚇醒自己嘅人、事、物。
對上一次我喺夢中夢入面係搵咗部電視嚟睇《午夜凶鈴》，望住貞子爬出嚟摙住我條頸，先脫離夢中夢。
至於夢之迷宮呢，就完全係另一套系統嚟。
「第一次見到夢之迷宮嗰陣，你點知佢係夢之迷宮嘅？」
「心房入面有大大個門牌寫住。雖然由第一次見到嗰度門開始，我腦入面已經自動同我講嗰度危險，入咗去就好難出得返嚟。但衰好奇心重，結果都係走咗入去一次⋯⋯」
我再補充最慘嘅係，會無咗開門入迷宮嘅記憶，然後就好似發夢咁，突然間再次出現喺某個地方。