是咁的，我嘅職業係幫人瞓覺: 一百五十六、愛與性

識咗咁耐嘅兄弟終於浪子回頭，明白到真正嘅快樂唔係在於身邊有幾多個女朋友，而係有無一個女朋友可以令你開心咁笑。

但另一方面，亦摻雜咗恐懼。

令阿邦咁大改變嘅女仔，係邊個呢？

答案顯然而見，余生知道矛頭所指向嘅前方。

盛開得最燦爛嘅花，自己嘅女朋友。





「我都係第一次有咁嘅感情，見到個女仔竟然唔係諗同佢上床先。我淨係想同佢拖手，摟實佢，同佢喺街上面你追下我，我追下你，咁就已經覺得好充實。搞唔搞野反而係其次。」

愛會包含性，性亦會產生愛，兩者理應相輔相成。

由於人成長之後嘅愛會自然包含依兩種元素，所以好多人會混淆咗所謂嘅「愛」。

而阿邦一路以嚟所講嘅愛，其實只係性慾。

以前當佢同余生講：「我鍾意咗條女。」其實潛台詞係：「有條女我想搞。」





有時有啲概念令人困惑的話，只要反撲歸真，就會搵返最純粹嘅答案。

我地每個人，細個話鍾意一個人嘅時候，並無包含想同對方發生關係嘅慾望。

你可以話小朋友未知咩叫真正嘅愛情，但我認為佢地比大人更貼近愛嘅本質。

如果一個女人，你同佢發生完關係就唔會諗起佢，咁係叫做雞或者sp，唔係女朋友。

只有當我地去除性慾之後，仲會留喺心房嘅人，先至可以叫愛人。





阿邦依個向來都將性慾錯認為愛嘅男人，竟然自己醒覺，因為佢心入面真係萌生咗真愛嘅嫩芽。