是咁的，我嘅職業係幫人瞓覺: 一百六十二、結婚嘅理由

「愛情依家野，真係令人摸唔透。雖然我對cheese講過我好愛好愛佢，佢亦講過好愛好愛我，但睇嚟我所講嘅『好愛好愛』同佢嘅『好愛好愛』根本唔一樣。」

余生一直覺得自己同cheese好夾，同佢一齊只有開心無唔開心，但睇嚟對方唔係咁諗。

或者一切都只係佢一廂情願。

「咁係發生咩事，先令佢嗰個『好愛好愛』嘅對象改變咗？」

余生有啲難以啟齒，但嘆咗口氣，再倒吸一啖大氣之後，聲線毫無高低起伏咁講：「佢兩個發生咗關係。」





余生話當日，佢兩個拖住手，好似懺悔一樣講咗無耐之前，佢地飲醉酒，上咗床。

乖乖女點解會飲酒呢？

某次佢同阿邦食飯，吐下苦水，話余生逼得佢太緊。

係阿邦提議佢試下飲酒。

乖乖女最可怕嘅地方係，喺咩都未試過嘅狀態下預先喺心入面認定咗某啲惡習係自己完全唔能夠接受，但當有一次唔小心試過，發現其實無想像中咁差嘅時候，就會馬上推翻哂以前嘅價值觀。





原來飲酒都唔係咁差啫。

之後cheese就開始飲酒。

咁佢預先覺得自己完全唔能夠接受嘅婚前性行為，又會係咩情況，可想而知。

cheese認為要結咗婚先可以發生關係，但發生咗關係，咁就要同依個對象結婚。

「歪理，被強姦犯食咗隻豬係咪要同佢結婚呀？」我不滿咁「嘁」咗聲。





講到尾，cheese心入面其實都係鍾意阿邦，先會得出依個結論。

「既然依個係cheese嘅選擇，佢覺得幸福的話，我又有咩權利阻止佢？」

雖然係咁講，但當時嘅余生仍然打咗阿邦一身。