是咁的，我嘅職業係幫人瞓覺: 一百七十七、事實

我一直喺余俊朗嘅夢境之中，亦即係喺佢嘅主觀世界入面。

主觀世界可以被人嘅價值取向所影響，發夢嘅人希望見到乜嘢，我就會同樣見到乜野。

亦即係我眼見嘅情景好大可能經過宿主嘅意志扭曲咗，雖然有部分係事實，但唔完全係事實。

比如話⋯⋯

我借咗余生部手機嚟睇，翻查紀錄，搜尋一句「did u cheat on me？」就搵返佢同阿婷最後講野嘅記錄。





夢入面，阿婷答「no」係大話，答「yes」係良心發現，而現實中嘅阿婷根本無回答過依個問題。

「我一直，等緊佢個答案。」

客觀嘅現實世界，阿婷無回應過，唔存在幻想嘅空間，殘酷、無情、冷淡又絕望。

但喺夢境，余俊朗嘅主觀世界入面，阿婷作出咗回應。

不過我已經睇夠主觀世界嘅願望，依家淨係想知返余俊朗先生喺現實經歷過嘅「事實」。





「你、阿邦同阿婷之間發生咗咩事？」

我想知道事實，而唔係迷宮之中呈現我睇嘅心願。