余生願意講畀我聽,但我亦要講返喺夢之迷宮嘅所見所聞作為交換。

余俊朗幼稚園嘅時候第一次見到沛芝婷,嗰一日黑色暴雨,佢兩個喺度等緊家長接。阿朗見阿婷喺度喊,所以送咗枝波板糖畀佢食。

「拜拜喇,大哥哥。」

第一次,心動嘅感覺。

阿朗一直記住依個隔離班嘅女仔。





之後阿朗見到另一個獨自坐喺角落嘅小朋友,佢嘅同班同學。

「邦邦,你媽咪都未到呀?」

阿邦抱住雙膝,點點頭。

「我陪你一齊等吖!」

「點解⋯⋯你明明都好驚⋯⋯」





「我係大哥哥!班長嚟架嘛!我唔驚嘅。」

阿朗同阿邦坐埋一齊,望住窗外嘅雨水,聽住久唔久一聲雷響。

「係喇朗朗,如果你媽咪嚟湊你先,你會唔會留低陪我架?」

「梗係會!我班長嚟架嘛!」

結果係阿邦嘅工人姐姐嚟到先。





被拖住嘅阿邦行向幼稚園大門,佢不停回頭,好似漏咗咩重要野咁。

阿朗忍住眼淚,夾硬擠出微笑向最後一個同學揮手道別。

「唔緊要架朗仔,你媽咪都好快會嚟接你。」

「我知道⋯⋯」

我知道⋯⋯但⋯⋯都係好寂寞啊⋯⋯得返自己一個⋯⋯

遠去嘅阿邦揈甩工人姐姐隻手,回頭跑返去阿朗身邊,坐低。

「喂!飯屋崎啦鵝地。」

「唔返!」阿邦堅決拒絕。





佢望向阿朗:「我陪你等到你媽咪嚟先走!」

「嗯!」

兩個人的話,就唔會寂寞喇。
已有 0 人追稿