我仔細咁諗咗一下夢境入面發生過嘅事,嘗試抽出有用嘅訊息嚟作推敲,睇下到底有幾多係可信嘅事實。

但我發現夢就係一個唔講邏輯同忽略理性嘅世界。

要用理性去收集證據、分析再得出結論依套方法,對夢係唔可行。

夢境嘅生成,只有少量規則可以應用,但依啲規則都會有例外。

如果試過發兩個夢,然後再思考「點解我會發依兩個夢?」就會明白要搵出夢嘅共通點,就好似喺黑洞入面搵光一樣咁難。





你可以上一個夢喺冰山上面食雪糕,下一個就喺立法會大樓被殭屍追,福爾摩斯都話唔到你知佢地之間有咩關係。

到你以為夢係以現實為養分同土壤慢慢生長,但會扭曲咁呈現出嚟,而且現實係完全相反嗰陣,你又會發現夢有時完全同現實見過乜、經歷過乜無關係。

喺夢入面見到未見過嘅人、去到未去過嘅地方、體會到未體驗體過嘅生活⋯⋯依個類別就同現實無關係。

你話夢一定扭曲咩?但有時又會發一啲直接而且目的性好強嘅夢。

你話夢一定係斷續嘅片段?有時會發兩個連接住嘅夢。





你話夢同現實相反咩?如果依條規則適用,咁恆仔就唔會一直停留喺幻想破滅嗰一幕啦。

簡單嚟講,夢嘅規則就係純粹嘅亂。

雜亂無章、散亂不堪⋯⋯

只能夠從宿主嘅口中,事後知道返佢以前經歷過咩事,先「有可能」理解到之前喺迷宮入面嘅真正意義。
已有 0 人追稿