是咁的，我嘅職業係幫人瞓覺: 一百八十一、影子

「又點會估到依家，我地唔會再聯絡吖。」

講到阿邦，余生嘅表情有啲黯然，好似烏雲遮掩咗陽光咁。

「我連佢嘅婚禮都無去。」

「喺夢入面，你仲猶豫緊去唔去。」

我好似講咗啲連余生都無察覺嘅事畀佢聽。





「原來⋯⋯係咁呀？我仲猶豫緊⋯⋯」

我將喺最後一個夢迷宮嘅所見所聞講哂畀余生知，一路聽，佢嘅眼神一路喺地下游移。

「當我話你聽，其實你一直有句祝福未同cheese講，無耐我就出返嚟。」

余生耷低頭，手枕喺自己嘅大脾：「祝福⋯⋯算啦，都過咗去。」

「我淨係知你心入面一直否定緊好多唔想接受嘅現實。」





余生望住手中嘅至尊寶公仔。

「我依家都有新對象啦，過去係點已經無所謂。」

「一個唔願意直接面對過去嘅人，無辦法真正向前行。」我指向佢個公仔：「過去嘅影子會一直纏住你。你之所以會對依個新對象有好感，係咪因為佢有阿婷嘅影子？」

余生唔想承認，但佢無辦法堅決咁否定。