是咁的，我嘅職業係幫人瞓覺: 一百八十五、你講大話

我同余生飲完水，諗住佢應該都係時候趕我走，但佢竟然拍拍旁邊嘅梳化位。

我坐返埋去。

「我嘅情緒會咁受影響，只係證明咗我真係無辦法反駁你。你問我點解對答案咁肯定，其實講真⋯⋯過咗咁耐，有時都真係會諗，到底事實係咪真係我諗嗰個。」

無錯，迷宮入面有呈現某啲事實，但由於係主觀世界，所以我睇到嘅影像有更多係余生自己嘅詮譯。

佢認為阿邦有心搶走阿婷，所以當諗返轉頭，就覺得阿邦嘅每個行為、每句說話都係早有所謀。





「阿朗，今日約你出嚟，係想同你坦白咁講一件事。」

「我⋯⋯我同阿邦拍拖喇。」

「我地唔想暪住你，依件唔係咩唔見得光嘅事嚟。」

余生耷低頭靜靜反駁：「講得好好聽吖⋯⋯咩唔想暪住我，只係喺度宣示主權⋯⋯你兩個背住我做過啲咩，自己心知肚明⋯⋯」

「點解你到依家都仲覺得我同阿邦喺我同你仲一齊嘅時候就有野？點解你係都要話我對你唔住在先呀？」





阿婷因為覺得委屈而反駁，阿邦伸手示意佢冷靜啲。

「你每晚同咩人wtsapp，點解對我愈嚟愈冷淡，你夠膽就發誓同阿邦一啲關係都無！」

「無。」阿婷好堅定咁講。

「呃人。」

「你心入面認定我有，我就算話無你都唔會信！反正你就係想聽到我話有啫？因為依個係你心入面嘅答案吖嘛，由嗰陣開始你已經無再信過我！但我要話畀你聽，我地分咗手三個月我先同阿邦再傾計，依個係事實。」





「你講大話。」