是咁的，我嘅職業係幫人瞓覺: 一百九十五、傾訴對象
正如嘉儀所講，佢的確無朋友。
又或者話，佢唔係嗰種社交能好強，廣識朋友嘅類型，佢一直覺得身邊有阿邦就足夠。
雖然余生唔係除咗阿邦之外就完全無朋友，但其實佢無同咩人真正交過心。
所以阿邦唔再係佢兄弟之後，余生亦失去咗一路以嚟嘅傾訴對象。
就算再識過新朋友，又有幾多個有耐性聽完佢依個咁長嘅綠帽故事？加上余生已經喺職場打滾咗咁多年，想好似少年時代咁識到可以交心嘅朋友就更加難。
仲有，廿幾年嘅兄弟都會背叛自己，咁佢又點會再有信心去識朋友呢？
「所以呢，多謝你願意同夢入面嘅我傾計，聽哂我嗰個咁失敗嘅愛情故事。多謝你就算明知我傻，都肯定我傻嘅價值，理解我傻嘅原因。」