是咁的，我嘅職業係幫人瞓覺: 一百九十六、捉錯用神

余生嘅道謝令我覺得慚愧，因為喺迷宮出嚟嘅時候，我忽略咗一個好重要嘅因素。

失去可以傾心事、有煩惱可以一齊商量、完全尊重自己嘅決定同心意嘅對象⋯⋯

就算幾嬲幾憎都好，要同一個識咗廿幾年嘅兄弟斷絕所有關係，當中點都會有悲傷存在。

我希望可以再有人嚟聽下我嘅鬱結。

我希望有人可以理解我嘅煩惱。





我希望可以放心同佢講我心入面最傻嘅諗法。

依啲意念互相交織，先至構成最後一層迷宮。而我，的確只係誤打誤撞死好彩先出得返嚟。

因為我根本捉錯用神。

夢想、愛情，最後係友情，每個迷宮都屬於唔同範疇，都有各自嘅願望。

但我誤以為余生嘅三個迷宮，係關於夢想、愛情同愛情。





真係失敗。

迷宮一層比一層更加深入，更接近內心深處。

即係話傷得余生最痛嘅，始終都係廿幾年嘅友情。