是咁的，我嘅職業係幫人瞓覺: 二百零一、拯救人心

「我都係第一次聽到有人委託我去幫自己以外嘅人瞓覺咋。」

會有客人使用完我嘅服務之後介紹畀朋友，但嘉儀係直接委託我去幫另一個人。

「因為我同miki喺嗰件事之後就做咗朋友，所以我知道佢心入面其實仲留有好強烈嘅痛苦。」

悲劇，先會令人記一世。

「當初我以為阿金嘅計劃成功咗，係呀，喺救返miki條命依點上面，佢係成功咗。」





嘉儀微微低頭：「miki每一次都會笑笑口話佢應承咗金仔要好好生存落去。但應承咗，做唔做到又係另一回事。」

咁又係，通常許下嘅承諾，應承你乜乜乜，十之八九都係做唔到。

「佢可以生存落去，但唔係好好生存落去。因為佢真係好掛住，好掛住金仔。」

「咪住！」我雙手做出「暫停」嘅手勢，嘉儀被我嚇一嚇。

「我無講錯自己有咩能力呀可？我淨係幫人瞓覺架咋。你話阿miki工作繁忙想用埋瞓覺嗰八粒鐘的話，我係絕對幫到手嘅。但你同我講佢好痛苦，好掛住前男友，依啲野我無能為力架喎。」





嘉儀側側頭：「但我聽完你講余生嘅事⋯⋯覺得你有拯救人心嘅能力喎。」