我望一望嘉儀遠去嘅背影。

「你朋友啱啱先同我傾完。」

「我朋友?」

「嘉儀呀,個網絡作家。」

miki笑咗出嚟:「哦~係呀,佢話搵你做個訪問,睇下得唔得意,用嚟寫小說吖嘛。」





「咁你搵我做咩呢?你話出嚟傾幾句,聽落唔似係委託我幫你瞓覺喎。」

「我有啲重要嘅事要同你講。」

我皺一皺眉頭。

有咩重要嘅事同一個素未謀面嘅陌生人講?「重要事」同「陌生人」本來就係扯唔埋嘅兩個名詞嚟。

「總之我地見面先再講啦,你咩時間比較方便?」





聽嘉儀講,miki係個記者,除此之外仲繼承咗金仔嘅工作,會幫想自殺嘅人寫遺書。

「呃⋯⋯唔係我身邊有咩人要自殺,所以你先搵我架可?」

心跳有少少加速,會唔會有人想交封遺書畀我睇呢?

miki嘅回答釋除咗我嘅疑慮。


「吓?唔係唔係,放心我唔係要畀遺書你。唔⋯⋯點講好呢?要同你講嘅事淨係同你一個人有關架咋。」





我嘅好奇心又再次被勾起。

一個半個鐘前先聽過名嘅陌生人打嚟,話要同我講一啲淨係同我有關嘅重要事,都算係難得嘅奇遇。

「啊唔係,又唔完全算淨係同你有關。準確啲講,係同近日開始出現嘅超能力者有關,而你係其中一個。」

我已經被依個話題牽動咗:「其中一個⋯⋯即係仲有識得用超能力嘅人?」

「無錯,詳細嘅情況,我地見到面再傾吖!」
已有 0 人追稿