到咗傍晚,夕陽將天空染成橙黃色,未完全天黑,雲彩同橙光構成晚霞,好似仙人喺空中架起嘅布幕。

一個細細粒,金色短髮,眼大大,少少包包面嘅女仔企喺肥姐門前買緊皇牌套餐。

我見肥姐嗰邊多人排隊,條路太逼,於是企喺對面馬路等佢買完過嚟。

旁邊嘅花店擺放咗一個個膠桶,插滿大大小小、粗幼不一嘅鮮花。

花店老闆見我望望下,以為有生意就問我想要咩花,我正喺度苦惱緊點打發佢走嘅時候,miki就拎住野食走埋嚟:「你食咗野未呢?」





花店老闆唔知誤會咗啲乜,大大聲笑住話:「哈哈哈!女朋友嚟到,叫佢自己揀啦!」

miki環視一下四周,又兀高望下我身後:「乜你女朋友嚟咗咩?邊度呀?靚唔靚女架?」

老闆高低眉咁睇下我地兩個,最後以笑遮醜,走返入舖頭剪葉。
已有 0 人追稿