是咁的，我嘅職業係幫人瞓覺: 二百一十一、腦癌

「確診患上腦癌。」

另一個超能力者呢？

「確診患上腦癌。」

確診患上腦癌。

腦癌⋯⋯





miki好認真咁講：「我知道你嘅超能力係真嘅。亦因為咁，搵你傾出嚟嘅目的就係要同你講，唔好再用超能力。」

佢合上筆記簿。

「之前嗰兩位嘅情況已經太遲，但你應該仲有得救。」

其實我心入面唔多唔少都預想過，用得超能力一定會有代價。

個天又點會無情白事賦予超能力畀凡人？





唉，我仲諗住靠幫人瞓覺賺首期買豪宅住洋樓養番狗架嘛，而家個發達大計同三十歲前退休嘅生涯規劃都要砍掉重練。

其實唔難想像點解會生cancer，如果超能力嘅源頭係大腦，咁使用嘅時候一定會對大腦造成好重嘅負擔，長期無節制咁用會令腦細胞病變一啲都唔出奇。

不過當聽到一個外人將我希望唔會成真嘅惡夢，清清楚楚咁話我知真係會發生，即使有預想過，仍然唔想面對。