是咁的，我嘅職業係幫人瞓覺: 二百一十二、另一個世界

「但係⋯⋯既然佢地嘅超能力都無辦法證實，咁你一開始係點樣搵到佢地。」

「唔係我去搵佢地，係佢地嚟搵我。」

miki靜靜咁講：「拜託我幫佢地寫遺書。」

當miki接受委託之後，為咗要知道應該寫咩內容，佢會希望知道哂自殺者嘅故事。

癌症嘅痛苦反而唔係尋死嘅主因，佢地要死係因為超能力已經唔受控制咁干擾咗日常生活。





第一位嘅眼中所見，經常同平行世界重疊，根本分唔到自己存在喺邊一個時空。今日見到時空A嘅過去，聽日見到時空B嘅當下，好似一個被人亂轉台嘅電視咁，開始精神錯亂。

第二位嘅耳中所聽，混雜咗唔同世界嘅雜音，無論身邊幾靜都會聽得到，有時甚至會聽到死人講野。就算整穿自己耳膜，聲音都依然繼續傳入大腦。

情況演變到最壞之前，佢地搵咗miki幫佢地寫遺書，自行了斷。

「我相信佢地所講嘅故事，所以當知道嘉儀搵咗個可以幫人瞓覺嘅超能力者見面之後，我就問佢拎你嘅聯絡方法。」

最後約咗我出嚟，將情況話畀我知。





同時，miki轉述依兩個超能力者所見所聞嘅，另一個世界。