是咁的，我嘅職業係幫人瞓覺: 二百一十六、曲金鉉

我地行咗去朗豪坊嗰邊，附近有棟商廈，直上去十樓，全層都屬於一間提供身體檢查嘅醫療公司。

miki走去櫃枱交代幾句，就幫我拎咗份個人資料表格叫我填。

我填表嗰陣，miki喺我旁邊摸住下巴，郁身郁勢咁諗野。

「做咩呀你？」

「我諗緊利益呀好處呀嗰啲野。」miki十指交錯，靠住凳背，抬頭望住啲燈。





「仲記得第一次，見到個想跳海嘅女仔，我當時其實咩都無諗，就走咗過去問佢使唔使我幫手寫封遺書。」

「結果呢？」

「結果佢用奇怪嘅眼神望一望我，好似當我傻婆咁，就急急腳走咗，哈哈，諗返都好好笑。」

依個女仔嘅笑聲唔知點解聽到就有啲心煩，但並唔討厭。

佢嘟起嘴，視線好似望緊天花之上嘅某啲回憶：「雖然我走去問佢嗰下，完全無諗過咩利益好處之類，又唔係諗住收錢嘅。但係我嗰下之所以會咁問，大概係因為我行動嗰一下，可以令我諗返起以前嘅男朋友。」





亦即係曲金鉉，原本幫人寫遺書嘅男人。