是咁的，我嘅職業係幫人瞓覺: 二百一十八、偽

見到佢嘅反應，我就知自己唔多唔少估中咗。

miki某個程度上，將ex嘅形象投射喺叫「金仔」嘅人，即係我身上。

「唔止我，就算你之後再見到幾多個金仔都好，佢地全部都唔係曲金鉉。」

勝利嘅手垂低。

「我係魏金玄，偽呀，假嘅金鉉嚟架咋，我唔係你嘅金仔。」





雖然咁講完全無留情面，但我覺得自己有責任令佢認清楚事實。

見miki坐咗喺凳上面無郁，我就去交咗張表格先。

「一陣我地會嗌你名⋯⋯」姑娘同我講解指示，等嗌名入房做磁力共振，即係MRI，然後出嚟等多一段時間拎報告。

「多謝先生使用我地嘅特快MRI磁力共振檢查。請等等。」

原來miki特登幫我卜咗特快嘅檢查，咁即係價錢會再貴啲啦。





喺姑娘處理緊我份表格嘅時候，我忍唔住望下身後呆呆咁坐喺度嘅miki。

幫一個陌生人預約驗腦，仲要係特快出結果嘅貴價服務，佢就無諗過我會負擔唔起檢查費咩？

錢咪我畀住先咯！

我估佢真係無諗過，因為就算我負擔唔起，佢都預咗幫我畀錢。