是咁的，我嘅職業係幫人瞓覺: 二百一十九、親眼見住

邊度會有人咁蠢架？一個人嘅資源同全錢都係有限架，個個都幫到頭來自己只會咩都無。

miki完完全全以將我可以得到嘅利益最大化為前題，帶咗我上嚟驗腦。

有咩可能純粹因為我都叫「金仔」就做到依個份上？

我拎咗姑娘交畀我嘅號碼卡之後就行返去miki旁邊坐低。

我一坐低，miki就話：「我知呀，你唔係我嘅金仔，依種事，我梗係好清楚。」





「你咁幫我，我作為受益人其實唔需要理咁多野，但你依個行為有少少病態，你又知唔知？」

依種病態可以好可怕，就好似一個被女朋友飛過之後，就將仇恨投射喺所有女人身上一樣。

唔少連續殺人犯都有咁嘅病態心理，可能簡單到因為飛佢嘅人係空姐，所以佢只要見到空姐就會殺咗佢洩憤。

miki嘅行為無傷害任何人，但佢嘅心理出咗問題，依點亦係無可質疑。

「我只係⋯⋯唔想再見到金仔死⋯⋯」





miki轉頭望向我，表情好平靜，但眼神最深處始終有一絲植咗根嘅哀傷。

「你又知唔知，我係親眼見住金仔墮地嗰一刻？」