是咁的，我嘅職業係幫人瞓覺: 二百二十三、wtsapp
我望向miki畀我嘅手機，入面係佢同金仔嘅wtsapp畫面。
「相比起幫你依個金仔，我覺得依個行為仲病態。」
直到依家，件事已經過咗一年半，佢仲會向無可能回應嘅手機號碼send訊息。
「早晨呀～」、「我食飽飽喇。」、「今日出去做野勁攰咯。」、「早抖金仔。」、「早啊！」、「今天吃了午餐肉。」、「太陽落山好似蛋黃，好想你陪我睇。」、「去咗食肥姐呀我。」、「晚安。」、「我琴晚發夢夢見你！」、「你有無掛住我先？」、「我就好掛住你喇。」、「我真係好掛住你呀曲金鉉。」、「今日執咗屋又大掃除，變到好整齊，我畀相你睇下。」、「失去你的第三十天。」、「午安～」、「今日有個同事同我表白咯。」、「我拒絕咗佢架，鬼叫我淨係鍾意你一個咩。」、「我⋯⋯發惡夢呀金仔⋯⋯」、「好想你可以喺我身邊摟住我一齊瞓。」、「記唔記得我地同居嗰段日子呀？我每日都會回帶一次，確保自己唔會忘記架。」、「我買咗隻毛公仔～」、「好大隻，我將佢隻手疊住我，就好似你抱我瞓咁。」、「我今日睇咗《我左眼見到鬼》，睇到流哂眼淚喎竟然。」、「我唱畀你睇吖，道別了怎可再見～就像這一生～再精彩也得一次童年～」、「我今日幫咗個叫阿螢嘅女仔寫遺書，叫我交畀金仔，我仲以為你出軌呀！」、「早安！」、「我今日會見金琉玹，佢係ptbf嚟，我應該要幫襯下，哈哈！」、「講笑啫，我對你一條心架。」、「早抖喇～」、「你唔喺我身邊嘅第二百零六日。」、「我地一齊發個好夢啦金仔～」、「突然間想同你講句我愛你。」、「今晚好大雨，仲行雷，好驚呀⋯⋯」、「好寂寞⋯⋯」、「今晚特別掛住你，係我地本來會一齊過嘅一週年紀念。」、「另一個miki已經消失咗。」、「我可唔可以⋯⋯嚟搵你呀？」、「我應承過你要好好生存落去⋯⋯但係⋯⋯好難呀⋯⋯我做唔到⋯⋯」、「早晨！今日又係新嘅一日喇！」、「有時會諗，我地一齊死咗⋯⋯係咪會好啲呢？」、「我愛你。」、「今日去咗美都食西多紅豆冰，仲記得你個衰人無啦啦錫我咯。」、「搞到我鍾意咗你。」、「搞到我咁鍾意你⋯⋯」、「衰人⋯⋯」、「衰人⋯⋯」、「你估我會唔會夢見你吖嗱？」、「自從你唔喺度之後，我就鍾意咗瞓覺。」、「我去咗睇《玩轉極樂園》呀，我會努力記實你，唔會畀你消失嘅。」、「放工喇我～」、「我同阿文去咗打邊爐。」、「嘉儀佢又準備出新書喇。」、「今日食咗個好豐富嘅早餐。」、「又到阿嵐生日喇，我寄咗心心畀佢架喇放心啦。」、「時間真係過得好快⋯⋯」、「我⋯⋯幾時先可以再見到你？」、「沒有金仔的第三百六十五日。」、「我今日見咗個識超能力嘅人呀！」、「原來⋯⋯無論有幾多個平行世界都好，我地幸福快樂嘅結局都唔存在喺任何時空之中⋯⋯」、「我真係好想返去被你話我煩嘅嗰段日子⋯⋯」、「我仲想同你去多好多次海洋公園⋯⋯」、「相念你喔。」、「下午好！」、「我睇咗一本書，叫人放下執著，點解佢好似講得咁簡單咁嘅？」、「我地仲有好多野未一齊做過⋯⋯」、「曲金鉉。」、「金仔～」、「金仔。」、「金仔⋯⋯」、「金仔⋯⋯⋯⋯」、「金⋯⋯⋯⋯⋯⋯」、「我好掛住你。」、「我要到幾時⋯⋯先有可能放得低你？」、「我聽嘉儀講佢會見一個叫魏金玄嘅人。」、「我去見佢喇。」