是咁的，我嘅職業係幫人瞓覺: 二百四十七、媽咪

阿媽之後走咗出廳，聽到佢好大聲好友善咁問候miki：「哎呀miki多謝哂你咁照顧我個衰仔，唔係得你的佢去驗下個腦都唔知佢有事啊。我個仔以後就拜託你睇住佢喇。」

miki敬咗個軍人禮：「放心包喺我身上！」睇嚟佢完全聽唔明阿媽嘅弦外之音。

「係呢你住邊度架？村屋？公屋？居屋定私樓呀？」

「啊，我住半山嗰啲獨立屋架。」

半秒之後，阿媽向廚房大叫：「老公！今晚整九大簋！！！」





「多謝伯母～」

「客咩氣吖，叫媽咪。」

「媽咪！」miki睇嚟真係完全唔知依句野有咩意思。

阿媽笑到見牙唔見眼行返入廚房：「出去招呼我家嫂啦衰仔，九大簋你識整咩？」半推半撞咁趕咗我出廳。

我同miki並排坐喺梳化。





「伯母好好人喎。」

「你被佢呃咗喇。」

「無所謂啦，咁難得有個人叫我叫佢做媽咪，被佢呃都唔緊要。」又係一句背後有故事嘅說話。

「你⋯⋯自己嗰個呢？」

「好細個嗰時死咗喇。」