是咁的，我嘅職業係幫人瞓覺: 二百四十六、人地知道未先？
「老公，佢大個仔喇，有毛有翼喇，有咩事已經唔會再第一時間講我地兩老知架喇。好似我當年無啦啦嘔，你都係第一個知，確定係有咗先同奶奶佢地講架嘛。」
我本來諗住繼續否認同miki係情侶關係，但阿媽自作聰明講完一輪，我發現聲稱係情侶可以減少好多麻煩，佢地亦少好多問題問。
兩老唔知我同miki今日第一次見面，咁就由佢地覺得我同miki已經暗地裏拍緊拖啦。
咁兩老就唔會問：「點解第一次見就帶你驗腦？」、「點解佢會一早知你有咩症狀？」依啲問題。
「係呀，miki知我有事好耐，所以先帶我去驗。既然依家確定有事，咁就無謂瞞你兩個啦，反正你地遲早會知。」
阿媽一野拍落我頭頂：「咁你即係認嗰個係女朋友啦！幾叻仔吖，收收埋埋咁耐。但人地知道未先？」
「知道咩未？」
「同你個死窮鬼一齊無好日子過咯。」
我即刻撥開佢隻手。