是咁的，我嘅職業係幫人瞓覺: 二百六十八、願望

而我張開眼嘅時候，我喺睡房。今次我無再見到時間靜止嘅異象，亦見唔到個神秘男仔。我想拎起床頭嘅針拮自己，但我發現無咗。

我即刻走出房，發現依個住宅單位嘅佈置同設計都好眼熟。

我衝入廚房，眼角見到抽油煙機被燒黑咗。

我隨手拎起一把刀就喺手背𠝹一下。

感覺到痛，亦有血水滲出嚟。





咁即係話，我一係喺現實世界，一係就喺夢之迷宮入面。

大門打開，一個金色短髮、眼大大、矮得得又平胸嘅女仔奇奇，拎住個購物袋走入嚟。

「金仔！今日係我地同居嘅三星期紀念日呀！我買咗午餐肉返嚟呀～」

頭部開始發痛，耳鳴亦一陣一陣咁喺腦內響起。

我望出窗外，遙遠嘅天空好似隱約有聲音喺雲彩之間散落。





「腫瘤比預期更加大。」

「點解一日內會大咗咁多⋯⋯」

「同我準備生理鹽水，快呀！」

我㩒住自己個頭，一段段斷裂嘅影像喺眼前閃過。

我個頭好痛⋯⋯





「以後請你多多包容小妹喇。」

「喂喂喂，我考下你。如果兩個唔識嘅人，連續遇到三次係咩呀？」

「金仔金仔，件衫襯唔襯我？」

「阿金阿金，我買咗妖怪手錶嘅百力支，一齊食吖！」

「阿金，同你一齊住，真係好開心呀。」

「搞到我好期待第日同你結婚啊！你會娶我架可？」

「點解咁快就過咗咁多日架？我知喇，開心嘅時間過得特別快，唔好同我講拜拜呀⋯⋯嗚。」

「金金金～我地係咪聽日去拜山呀？」





大量生活片段好次走馬燈咁喺眼前播放，令我產生一個疑問：我到底喺度過咗幾多日？

「二十一日。依個就係我同佢，同居嘅日子。」

廿幾歲嘅男仔再次出現喺我面前。我頓時醒覺，配合埋我用刀𠝹自己嗰吓，同埋天空會響起人聲，我可以好肯定依家係喺夢之迷宮入面。

我嘗試將見過嘅客人名拆解重組⋯⋯

梁、美、奇⋯⋯阿me⋯⋯美奇⋯⋯美琪！梁美琪！係miki！我終於記起喇，我係為咗miki先入嚟！

我入到嚟迷宮都係被混淆到記憶錯亂，竟然唔記得咗自己係入嚟解開miki嘅心結。

當所有拼圖歸位，我喺現實同夢中嘅記憶都自動重新整理一次。





無錯喇，我幫miki瞓覺，遇到佢嘅第二人格，逃走嘅時候搵到另一個心房，再進入miki嘅心之迷宮。

我將視線慢慢移向旁邊嘅男仔身上⋯⋯

「我等咗你好耐喇，魏金玄。」

男仔友善咁向我微笑。

「曲金鉉⋯⋯但你已經死咗，點解⋯⋯仲會喺度？」

「你有無試過發夢見到已經離開咗嘅親人？」

我點點頭，應該好多人都試過。

「其實人嘅意識就係靈魂，而夢係潛意識嘅世界，所以靈魂喺夢入面出現係好常見嘅事。」





曲金鉉話，只要靈魂未投胎，就可以穿梭喺唔同人嘅夢境之間。

不過靈魂無辦法直接影響人嘅夢境，所以佢先借我嚟幫手。只有我先有能力干涉夢境，影響人嘅潛意識。

「但你已經死咗差唔多兩年，乜投胎無時限架咩？」

佢微微一笑：「你未死過唔知架喇。投胎其實根本無時間限制。如果有生者一直放唔低死者，無辦法過新生活，咁死者就會一直留喺度徘徊，無得投胎。」

但等幾耐都好，始終有一日會投胎。假設miki一直放唔低金仔，但到佢死嗰日，佢就會同金仔重聚，兩個一齊投胎。

「所以依家係因為miki放唔低你，你又干涉唔到夢境，於是利用我幫miki放低，等你有得快啲投胎？」我忍唔住語氣有啲嚴肅。

曲金鉉無奈咁聳聳膊頭：「對死咗嘅人嚟講，投唔投胎、快定慢根本就無所謂。我叫你幫手，唔係因為要快啲投胎。」





我只係想見到miki佢再次有幸福。