是咁的，我嘅職業係幫人瞓覺: 二百六十九、miki就交畀你喇

曲金鉉平靜而強而有力嘅說話，重重咁打入我心口。

啱啱仲懷疑佢自私，語氣咁重，我頓時覺得好慚愧。

「我走咗之後，miki身邊斷斷續續咁出現過一啲人，但都唔係可以發展嘅人。不過見到你，我就知係你。我只可以救到miki條命，但你救到嘅，係佢個心。」

佢走近我，好似將寶物交付畀兄弟咁，雙手捉住我膊頭。

「我叫你做嘅事，就係喺一啲重要嘅時刻頂替我嘅位置。」





見證布甸仔死嗰日、第一次食肥姐，開始產生感情嗰日、喺美都第一次接吻嗰日、同居嘅每一日⋯⋯⋯⋯

依啲都係對金仔同miki兩個最重要嘅回憶。

布甸仔嗰一日，我係幫miki解開心結。其他日子，曲金鉉希望miki每當諗起開心回憶嘅時候，腦入面就會有我模糊嘅影子。

亦即係話，每當miki諗起同曲金鉉嘅開心回憶，其實就等同諗起我。

「所有悲傷都由我承受就夠。嗱，幫你舖哂路架喇，最後成唔成事，就靠你自己喇。」





我忍唔住鼻頭一酸：「點⋯⋯點解呀？」

曲金鉉歪頭：「咩點解？」

「我係你情敵嚟架⋯⋯你咁樣做，miki真係會放低你，愛上我架⋯⋯」

佢揑一揑我鼻頭：「傻仔，我都講咗，重要嗰個唔係我，係你呀。我已經死咗架喇，你明唔明白呀？」

我果然，依一世都無可能比得上眼前依個金仔。





「當你真係好愛好愛一個人嘅時候，就會識得去放手。我只係想miki可以幸福咁生活落去，如果佢嘅幸福包含我，梗係好啦，但就算無我份，只要見到佢幸福就夠架喇。」

眼淚流咗出嚟。

「我已經死咗，佢嘅幸福點都無可能包含我在內架啦嘛。我一直睇住佢，佢應承咗我好好生活，但佢只係做到努力生存落去。睇見佢咁辛苦而我咩都做唔到，係好心痛嘅事嚟。」

佢用力拍打我嘅膊頭：「既然依家見到一個真係有能力幫miki放低我，令佢幸福嘅金仔，我梗係全力幫你架啦。」

曲金鉉摟住我，佢嘅身體好似羽毛同綿花，又似白雲咁輕、軟。

「miki就交畀你喇。」











「啊！！！！！！」

我同曲金鉉一齊望向天空，啲聲係⋯⋯迷宮上一層有人尖叫。

我地交換一個眼神：「miki！」