是咁的，我嘅職業係幫人瞓覺: 二百七十一、最後機會

「咁嘅結局係最好架喇。」本身已經死咗嘅曲金鉉摟實用刀刺穿佢胸口嘅另一個miki。

「你一直都只係想報依個仇啫。想親手用刀捅穿我嘅心口，你完成咗喇。」

佢嘅聲音好溫柔，完全唔似同緊一個想殺自己嘅人講野。

佢嘅聲線⋯⋯好似氹緊半夜因為惡夢驚醒嘅愛人瞓覺咁。

「你完成咗喇。」





「點解對我咁溫柔？」

曲金鉉笑住撫摸另一個miki嘅頭：「因為你都係miki啊。」

「嘻嘻嘻嘻嘻嘻嘻嘻嘻⋯⋯⋯⋯」另一個miki發狂咁喺度笑，但係佢嘅笑容上不斷落下眼淚。

「嘻嘻⋯⋯嘻、嘻、對⋯⋯唔住⋯⋯係因為我⋯⋯我存在⋯⋯先害死你⋯⋯」

曲金鉉搖頭：「唔係你嘅錯嚟。你完成咗心願喇，我地一齊走，好無？」





另一個miki好似小朋友咁，點點頭，將頭埋入曲金鉉嘅胸口，合埋眼，就無再醒過。

佢地兩個開始化成一粒一粒白雲形狀嘅光點，飄升到半空，離開夢嘅世界。

「咪⋯⋯咪住呀！」miki大叫，想跑過去。

曲金鉉轉身，伸出手，叫miki停低。

「金仔！我咁難得先再見到你，其實我有好多好多野想同你講⋯⋯我好掛住你呀⋯⋯」





「我都係。」

曲金鉉同梁美琪嘅眼一齊湧出淚水。

曲金鉉嘅同另一個miki嘅身體已經消失到大脾。

我見已經無咩時間，於是開始哼一首歌嘅前奏。

聽到前奏，背對我嘅miki耷低頭揞住嘴，淚水隨住膊頭嘅劇震落下。

「如果我再有機會見到金仔，我一定會唱依首歌畀佢聽。」

依個係miki講過嘅願望。

佢終於再有機會見到金仔，依個亦係最後嘅機會。





miki無再多講，配合我哼嘅前奏，憑歌寄意，對曲金鉉唱出佢練習咗成千上萬次嘅《everglow》。