「發生咩事?點解miki會入咗嚟?」我從來未遇過客人喺我瞓緊覺嘅時候走入夢境,佢到底點入嚟?

「唔好理咁多住,我地要離開迷宮先。miki有危險!」

「但係迷宮要解開哂心結先會放我地出去架!」

曲金鉉指住我胸前嘅捕夢器:「你許願啦,許願返去心房!照做啦!我唔知你邊度得嚟,但佢嘅靈力足夠送我地離開迷宮!」

我聽唔明曲金鉉講乜,但一諗到miki情況危急,刻不容緩,我就馬上拎起恆仔送畀我嘅捕夢器,合埋眼許願。





帶我地離開迷宮啊!!!!!

捕夢器上嘅種子發出綠光,將我同曲金鉉包圍,轉眼間我地就去返心房,種子亦得返一粒。

「我地一齊玩吖!梁美琪!!!」

我同曲金鉉返咗去「幸福心房」,聽到大門外嘅「悲痛心房」傳嚟另一個miki嘅笑聲。

我地衝去開門,見到一個拎住刀嘅miki壓住另一個miki,拎刀嗰個喺度狂笑。





「嘻嘻嘻嘻嘻嘻嘻嘻嘻!天堂有路你唔走,地獄無門你就闖入嚟!殺咗你!殺咗你我就可以代替你個位!」

miki表情扭曲咁頂住miki把刀,刀尖已經對準眉心。

「殺咗你!殺咗你!殺咗你!」miki每講一次,雙手就更用力壓落去。

喺我思考之前,身體已經行動咗。我衝上前,將持刀嘅miki撞開。

「金玄!」





我即刻扶起miki,同時曲金鉉亦過嚟,擋喺我地同另一個miki之間。

「呃⋯⋯⋯⋯你係⋯⋯⋯⋯金仔?」

曲金鉉微微轉身:「好耐無見喇,miki。」

miki呆呆咁望住佢嘅背影:「你⋯⋯已經死咗⋯⋯點解仲會喺度?」

「為咗令你放低我,得到幸福,所以我喺度。」

淨係一句,已經令錯愕嘅miki湧出眼淚。

「你兩個退後啲。」

我護住miki退後,問佢:「點解你會入咗嚟架?」





miki驚魂未定,但都擦走淚花答我:「你⋯⋯你話契約時間入面,食安眠藥都唔會瞓著吖嘛,咁過咗契約時間,我咪試下食藥瞓咯。」

「你食藥瞓做乜鬼先得架?」

「你做完手術都唔醒呀!我淨係諗到依個方法入嚟搵你咋。我諗住入嚟叫醒你架咋,點估到另一個我會無啦啦彈出嚟喎!」

另一個人格嘅miki好似木偶咁,拖住扭曲嘅身體企起身,提起刀指向我地三個。

「今日有三個畀我殺嘻嘻嘻嘻嘻!」

「平時發夢我都唔見另一個我仲喺度架⋯⋯⋯⋯佢唔係⋯⋯消失咗喇咩?」miki全身震哂。

「佢無消失到,只係因為金仔死咗,佢先無導火線佔據你嘅身體。但佢一直都仲喺你潛意識入面⋯⋯係我唔小心放咗佢出嚟。」我自認係自己嘅過失。





「正好,你放咗佢出嚟,我先可以帶佢走喇。」背對我地嘅曲金鉉靜靜講咗一聲。

另一個miki向我地步步進逼,我本來想同miki退入「幸福心房」,但房門竟然閂埋,仲好似之前咁卡住咗,無論我點用力開都開唔返。

「之前掛住插你興奮得滯,一時大意被你開咗門,今次唔會架喇~依邊大屋嘅一切都係我控制架,你地走唔甩架喇~一齊玩捉依因啦好無?不過輸咗要死架喎!」

另一個miki好似喪屍咁行過嚟,刀身上反射出慘白嘅寒光,令我嘅心跳因為恐懼而加速,但身體條件反射咁擋咗喺miki面前。

曲金鉉斜眼瞄一瞄我,微微一笑:「我無睇錯你。」

曲金鉉講完,就向另一個miki衝過去。

「金仔!」我身後嘅miki都跑咗上去。

「危險啊!」我捉住佢隻手。





「曲~金~鉉!!!!!!」

嗤。

一瞬間,所有事物好似靜止哂咁。

曲金鉉張開雙手保護我同miki,刀尖喺佢左背穿出嚟。
已有 0 人追稿