[劇毒]自從裝左小熊來電之後……我部電話就無響過……: 2
[10/06/2177 09:13]
「BU~BU~BU~BU~BU~」我用鼻同口噴出一個個氣泡，除左依啲噴氣聲，我就咩都聽唔到，好靜好靜。
因為我已經閉上雙眼，所以眼前有咩我都望唔到。
依個黑暗既世界就彷彿係我既世界，我想要咩就可以見到咩，但係我只係想冷靜，我想要既係空白，一個咩都無既空間，但係……
「knock knock」敲門聲打破左我想要既寧靜。
「盧議員？」一把低沉而雄厚既男人聲經門外向我問好。
「係，莫sir，我無事。」我即刻由洗手盆gut番個頭出嚟拎震定咁答佢，廢時嚇親佢。
莫sir以佢果把老差骨既聲線好有禮貌咁去同我講：「盧議員，麻煩你盡快，仲有十七分鐘，專車就會前來接送。」
雖然我都已經喺依個現實世界生活左差唔多一年，但係對於依啲聲線同語氣唔夾既情況我都仲未慣。
就好似依位莫sir咁，佢果把粗獷既聲線，講野理論上應該都比較粗魯啲，但係事實上無論你聲線係點，大部份人講野都係好文就就。
點解？
因為佢地都係勞工系統既棋子，佢地都係由超級電腦控制。
我雙手頂住洗手盆，掙住上身，對住廁所塊鏡望住半裸上身既自己。
肌肉分明既線條，基本上可以拍得住"以前"荷里活任何一位男星。
不過喺依加咁既時代，咁既身形根本好普遍，點解？
因為練肌肉已經唔再係一件苦差，當我地進入運動模式既時侯，超級電腦就會控制我地既身體，而我地既意識一早去左老遠玩。
喺依個世界再無任何苦差，辛苦啊？交比超級電腦啦，自己就可以去玩。
「盧議員？」莫sir又再提一提我。
我唔好意思咁答佢：「係，你等多我五分鐘。」
我快快手著番起一早掛喺牆上既shirt衫同西裝褸，打好條呔，正想行出去果陣，我先留意到果張神秘晶片。
由果一日開始我就帶住張晶片形影不離，雖然佢到今日都無咩反應，但係我都照當佢係護身符咁帶喺身邊。
我一手拎起佢將佢放左喺心口個西裝內格到就行出廁所，跟住莫sir落去等我架"專車"。
好好彩地，或者應該係一早就已經計算好，我同莫sir落到去有幾架黑色車已經馭到。
點知我都未行到去其中一架七人車道車門已經打開左。
焦燥既Karen向我招招手示意：「摺，啊麟，快啲上車啦。」
「我又無遲到，摺我做咩啊？」我繼續斯斯然咁行去架車到，係要同Karen鬥氣。
「Come on！快啲！快啲！」Karen開始黑面，搞到我都唔敢慢條斯理咁行，唯有快步走上車，莫Sir尾隨我坐上車頭位。
「開車啦。」莫sir一聲令下，我地就由旺角向住立法會既方向去。
當我坐定喺架車到，忍唔住Karen抱怨道：「呼！做咩咁急啊？」
「話晒今日係我地正式升職啊，點可以遲架……」佢停左停，再望望莫sir，細細聲同我講：「你睇下睇下，毛議員佢地仲送左幾多禮物嚟啊！」
Karen興奮到拎左部平版電腦出嚟掃掃掃，show比我睇Y大區既議員送既戰利品，又有咩咩香水，咩咩手袋，仲有幾架跑車咁。
我望住佢咁開心，都唔敢掃佢興，比佢知我收左部私人飛機。
對於依啲野，我只係冷冷咁笑左笑，其實講到尾咪又係賄賂。
我地既身份絕對唔係單單一個職位咁簡單，依個位可以話係咁多個Y大區議員都未做過既位。
個重要性比起任何一位都重要，都意味著我地既權其實好重，但係敵人都會相對多左，特別係美國A大區果邊，仲有果班恐怖份子。
如果唔係白西裝佬都唔會排班警察睇住我地。
當我地入到去過海隧道果陣，莫sir擰轉頭同我地講：「盧議員，我地……」
「碰！」誰不知一下爆炸聲打斷左莫sir。
本來喺我地前面擔當護維既私家車發生爆炸，我第一個反應係耷低個頭。
「碰！」點知一波未平一波又起，後面架私家車又炸埋一份。
我頭擰擰坐望右望，仲未理解到咩事。
我只係見到窗外面火光紅紅，而Karen就掩住隻耳仔大叫。
至於坐我地前面既莫sir已經解左安全帶落左車走向我地打算救我地。
依個時侯，我feel到心口塊晶片喺到震。
莫sir拉開左車門對住我地話：「拎塊晶片出嚟……」
「碰！」點知佢野都未講完就被粒唔知邊到嚟既子彈射穿個頭。
「碰碰碰！」有班帶住電單車頭盔既西裝佬揸住架電單車，拎住支機槍圍住我地三架車亂咁射。
我同Karen都烏低個身，唔想比佢地射中。
槍聲一路無停，直到護送我地既警察死晒，班西裝佬先停手。
我望望手上面果塊晶片，或者佢有用？
我唔知，唯有博一博啦！
我問Karen：「喂，你有無帶到果塊晶片？」
Karen點點頭：「嗯！」
我：「我地食左佢啦！」
Karen：「下？點解？」
「唔好理咁多啦！照我咁做！」我無理到Karen就一野啪左塊晶片落肚，再順便拎埋腦入面張晶片同其中一個死左既警察交換。
Karen見我咁做，唯有有樣好樣啦。
過左一陣，班西裝佬走近我同Karen，捉住我地，同我地打左支針，我地就暈左……
直到醒番果陣，我同Karen就已經喺個黑媽媽既密室到……