[劇毒]自從裝左小熊來電之後……我部電話就無響過……: 16
[1/3/2015 21:44]
開始踏入十點，或許因為接近收鋪時間，Starbucks內既顧客都開始一一離去，店員都開始打掃既工作。
唯獨我地仲留喺間鋪入面，當然無人會注意到我地。
龍友set多左兩個腳架喺窗邊之後，就走過嚟話：「OK啦，咁邊個去負責果兩邊睇水？」
啊樺望一望龍友徵同佢既意見：「等等先，我仲有啲問題想同大家傾，我諗暫時有四眼警察喺下面頂住應該OK既。」
龍友聳聳膊無咩意見，啊樺就繼續佢既問題：「我想問多次大家，你地都係因為裝左小熊來電加強版，所以先會搞成咁？」
「係。」
「無錯。」
「嗯。」
大家都表示無異議。
啊樺再追問：「咁你地係幾時裝個Apps，點解裝，仲有幾時發現自己變到透明？」
大隻佬話：「頂！講起就火，琴日晏晝四點幾開緊工果陣，有成三四個廣告電話打嚟，我咪裝個小熊來電，點知都block唔到，咪試下個加強版囉。一裝就再聽唔到啲廣告電話，但係果陣我仲同到屋企聯絡，如常開工。喺書局都講過啦，發現自己正式出事就係開工果陣。」
MK仔話：「係啊係啊，就係果啲咁既死人廣告電話，我都係試過小熊來電block唔到，所以先down個加強版。」
啊樺既視線環視全場，無一不點頭咁SAY晒YES，啊樺再話：「即係大家都係因為有好多廣告電話打嚟，但係小熊來電又無用，所以就轉用小熊來電加強版？如果係咁你地講番大概幾點裝，仲有幾點發現出事。」
啊樺喺佢個背囊入面拎左支筆，再用STARBUCKS既紙巾，喺上面畫左個格仔，準備Mark低大家既野。
MK仔：「琴日夜晚十點裝，今朝起身十點發現出事。」
龍友：「琴日下晝三點裝，第二日起身九點就知出左事。」
援交妹：「都係琴日凌晨三點裝，今日起身十一點先知出事。」
港女OL：「摺，琴日朝十點裝囉，今朝起身……UM……咪八點到知道出左事。」
大隻佬：「岩岩講左，琴日晏晝四點裝既，今朝都係大概起身果排啦，六點幾啦……知道出事。」
運動姐姐：「UM……大概係琴日朝十一點裝，都應該係今朝八點知出事。」
我：「我係琴日夜晚十一點裝，跟住一過凌晨十二點就知出左事。」
Major Tom：「琴日凌晨四點裝，跟住凌晨三點知道出左事。」
最後啊樺：「琴日，凌晨一點，今朝起身九點。」
啊樺抄完之後，將張紙巾遞左出枱中心比大家睇：「你地點睇。」
龍友一手就搶過張紙巾話：「照道理睇，有人一早就揀左我地做target，但係時間上面又無咩pattern可言，只可以話大家裝apps都係琴日既事，但係出事既時間就係今日既事。」
龍友講左啲啊媽係女人之類既廢話出嚟，若果唔係有人揀左我地做target，又點會狂打廣告電話迫我地裝個咁既死人Apps。
「等等先，啊靚仔你距離裝個apps同發現出事既時間好似有啲短。」港女OL用一個質疑既眼神望住我問。
我答話：「咁我琴日送完我女朋友搭車之後都成十二點一二，咁岩我部電話留左喺糖水鋪到，一去到搵就知出事。」
港女OL再追問：「等等先，今日下晝，你仲講左啲好矛盾既野，我記得你話你啊媽四點幾同你講早抖，但係你又話十二點幾就發現自己出左事，it doesn't make sense！」
衣個時侯，大家都用住一個質疑既視線望住我，而我真係唔知點解釋好：「Er……」
大隻佬見到我咁難做，即刻企出嚟話：「我覺得……佢應該唔會講大話，至小佢唔係幫西裝佬既。因為今日去偷拍西裝佬果陣，有第二個西裝佬接近佢都無推我去死。」
我用一種帶有感激既眼神望住大隻佬，佢對我笑左笑。
啊樺：「先拋開衣個問題先，我想問一問Major Tom關於西裝佬既野。你可唔可以詳細小小講你今日既事。」
Major Tom咳左咳清一清喉嚨話：「我好記得今日當我用電腦分析晒所有打得通既電話後我先出門，所以我先……」
啊樺：「等等，你既意思係我地在座咁多位已經係所有出事既人？」
Major Tom點左點頭話：「係，我電腦只係搵左九個人出嚟。」
啊樺點點頭話：「嗯……咁你繼續啦。」
Major Tom：「因為電腦果度，所以我先遲左。當我一出地鐵既時侯，無啦啦我就比人喺後面斬左我隻手一刀……」Major Tom不禁按一按手上既傷口「……我再望就知係班西裝佬，佢地一腳踢低我，仲想走埋嚟劈多我幾刀。咁我唔理咁多企番起身走，佢地咪劈多我幾刀，不過有班乘客擋一擋佢地先阻我唔到。」
龍友問：「咁你又肯定佢地會偽裝成普通人？」
Major Tom：「因為我望過地鐵入面一個西裝友，而且我仲見住其中一個普通人啲皮膚無啦啦散出蒸氣，跟住成個人就液化左再重組做西裝友……」
Mk仔笑笑口咁講：「嘩！Matrix咩。」
Major Tom瞪大對眼成個痴線佬咁望住Mk仔：「我講真架！」
啊樺伸伸手叫停Major Tom：「得啦得啦。如果係咁，我地都係減小去人多既地方。By The Way, Major Tom你電腦分析過既資料有無copy喺手？」
Major Tom：「無啊，喺屋企，不過我諗果班西裝佬應該已經喺我屋企到守住左。」
大隻佬：「正常啊，你睇下連dee dee做野既地方都有人守住，即係話佢地已經起晒我地底。」
港女OL：「但係佢地遲早都會搜到衣間Starbucks。」
啊樺：「無錯，我地連佢地有幾多人都唔知，而且地鐵站都應該比佢地封住左。」
援交妹：「超！搭車走咪得囉。」
運動姐姐：「啊妹妹，走去邊啊？」
援交妹：「我地十個人，香港有十八區，點都會有啲地方佢地搵唔到既！」
比援交妹一講啊樺叮一聲又再拎起紙筆，衣個時侯大隻佬：「等等，我落一落去頂啊四眼哥哥更，講明先我就住大埔既。」
如是者我地又停左討論……