[劇毒]自從裝左小熊來電之後……我部電話就無響過……: 17

[1/3/2015 22:34]

大隻佬一走，大家又將焦點集中去我身上，佢地果一種質疑，不信任既視神愈嚟愈明顯。
我感覺到膊上果種無形既壓力愈嚟愈強，我已經頂唔順所以就企起身話：「我落一落去沖下咖啡飲，反正今晚都有排捱，你地……」
講到衣到我都唔敢問洗唔洗沖多杯比佢地，廢時又話我落毒，到時只會自己無面。

我正想轉身走人果陣，啊樺都企左起身話：「一係大家休息下先啦，我都想沖下咖啡。」

大家見啊樺咁講都表示無咩所謂，或許自從由書局果陣開始，啊樺沿沿被大部份人默認左做我地既領袖。
算係個副領袖既龍友就補句話：「係囉，咁我落去沖咖啡，有無人要？」





MK仔見龍友話落去，佢就話：「大佬奇落我又落啦咁。」

援交妹舉舉手對住MK仔單曬眼話：「啊~賢賢，我要多杯mocha。」

運動姐姐望住我話：「咁……啊……」

我見運動姐姐講唔出我個名就即刻答話：「我叫啊麟。」

運動姐姐尷尷尬尬咁話：「啊麟，麻煩你比杯暖水我同Major Tom啊。」





一直唔出聲既港女OL無啦啦好大聲咁咳左咳，龍友見到就即刻狗公式問佢：「啊！Karen，你想要啲咩？」

港女OL扮晒不經意咁答：「哦，唔洗啦，唔該。」

望住龍友我都不免為佢感到可憐……

如是者，我地落左去一樓，咁岩職員都清潔得七七八八，MK仔同龍友即刻衝去COUNTER收埋啲包同CAKE。
至於我就同一直企左喺入口既四眼警察講：「辛苦你啦。」





四眼警察：「唔辛苦……」佢再轉望去我隔離既啊樺話：「係呢，啊……妹妹，我聽啊強哥講左你地上面傾啲咩。我講番我既資料先，我係琴晚十點裝個apps，今朝起身六點正發現出事既，仲有我住黃大仙既。」

啊樺客套咁笑左笑話：「哦，唔該你啊四眼。By the way，叫我啊樺啦。」

四眼警察伸左隻手出嚟話：「你好，我叫Stephen。」
啊樺同佢握左握手就走左入去。
我補多句：「你好啊Stephen，我叫啊麟。」就跟啊樺入左一樓。

我走上前向啊樺道謝：「喂，唔該你岩岩幫我解圍，多謝你肯信我。」

啊樺無啦啦走近我再壓低聲線喺我耳仔邊話：「唔係因為我信你，只係因為我同你一樣，裝Apps同出事既時間一樣差距短。」

「下……咁你又話……」

啊樺陰陰嘴咁笑左笑：「我就係知道講出嚟會比人質疑，所以我先作。」





一聽到衣個消息，我心入面寒左寒，點解我面前衣個女人咁恐怖……
明明一開始見佢成個痴線婆咁，但係原來佢係咁攻心計……
讀政治既係咪個個都咁恐怖……

如是者，我地幾個就喺個counter到搞咖啡，而果班職員就完全無視我地既存在，甚至連咖啡機用緊都唔知。
佢地開始熄燈，準備關閘，龍友見衣個時侯就同MK仔講：「啊賢仔，你去拎鎖匙。」
MK仔點點頭就等個經理關好閘，走過去好順手咁拎左條鎖匙。
經理望一望間鋪，熄埋燈就由後門走左。
而間STARBUCKS就得番我地十個……

當我地拎住啲飲品上番去既時侯，「砰！」一聲，無啦啦有啲野撞左去地下道鐵閘到。

「砰！」又再撞多獲。






FUCK！係啲咩……