[劇毒]自從裝左小熊來電之後……我部電話就無響過……: 19

[2/3/2015 04:39] 

我坐左喺窗邊，飲住唔知第幾杯Espresso，望住樓下既街景。
雖然已經凌晨四點幾，但係街上面不乏見到啲MK夜青走嚟走去，多數都似係岩岩去完劈酒。
有啲唔飲得既就企左喺街邊嘔，甚至見到有一兩條女訓左喺街到。

我回頭望望二樓入面，要訓既都訓左，四眼警察同大隻佬都已經上左嚟休息。
成層就得番Major Tom未訓，同我一樣，監視住另外一邊窗。
至於MK仔同龍友就去左樓下守大門。





「唉！」我嘆左口氣，開始明白原來做夜班看更真係好悶，真係唔怪得佢地會偷懶訓覺。
但係我仲慘，連訓都唔得，因為一訓又唔知會有咩事。
望住街上面，或者我可能慣左，都望左幾粒鐘，已經唔再覺得心寒恐怖，反而係一種孤獨。
無人理既感覺真係好唔好受……
我心裡面開始有一種好矛盾既諗法係：「如果唔係啲西裝佬，我諗我都唔知自己係存在緊……」
望下望下，我就發現對眼皮愈嚟愈重，愈嚟愈重……

當我再醒番既時侯，已經係六點幾七點，MK仔同龍友陰陰嘴笑住咁由一樓行番上嚟。

龍友走過嚟同我講：「喂，換位到你落去門口睇水啦。仲有叫埋你個大隻仔FRIEND啊。」





我半醒半睡咁瞇晒眼咁答：「哦……好啊……」

龍友佢走埋去同MK仔咬晒耳仔又細聲講大聲笑，睇嚟又唔知做左啲咩衰野啦……
我走埋去大隻佬個位到拍醒左佢，拉埋佢一齊落一樓睇水。

本來休息既龍友就跟住我地落去，我問佢：「做咩啊你！」

龍友輕挑咁對住我地講：「我放左啲野喺個員工更衣室到姐，無野啊。」





望住佢個樣咁衰格搞到我有種想打佢既衝動，不過佢都算半個大佬，所以無得郁手啦。
我同大隻佬企就如是者坐左喺一樓個門口到繼續守崗，等下等，等下等。

「啊！」無啦啦更衣室入面傳嚟大叫，成身血既龍友由更衣室到跑左出嚟大叫：「仆你個街！好痕啊！好痕啊！」

本來仲喺樓上休息緊既人沖左落嚟睇咩事，啊樺即刻衝上前關實左一樓入口既玻璃門唔比龍友拍出嚟。

但係佢一個女仔既力氣又點夠龍友大，佢望住我同大隻佬話：「快啲過嚟幫手啊！」

不過我地依然無動於衷，啊樺再對住我地大叫：「快啲啊！」

最後我走左過去同啊樺一齊頂住對門，而龍友塊面就貼住對玻璃門，望實我大叫：「好痕啊！屌你好痕啊！」

佢喺入面不停咁抓自己，身上面既皮膚開始抓到出晒血。





龍友繼續拍門大叫：「放我出去啊！求下你地啊！我錯啦！」

望住佢個樣，我真係唔忍心，特別係佢果對可憐既眼神，我唯有擰轉頭唔敢望……

「放我出去啊！」
「救命啊！」

龍友不停求救，但係無人夠膽上前去幫佢，唯有擰轉頭唔望……
佢既呼叫聲愈嚟愈細……愈嚟愈細……
直到最後，佢訓左喺地，郁都唔郁……