[劇毒]自從裝左小熊來電之後……我部電話就無響過……: 18

[1/3/2015 23:51] 

「砰！」

係咩……

「砰！」

西裝友？





「砰！」撞左兩三獲之後啲聲就停左。

我，啊樺，MK仔同龍友企左喺樓梯到唔敢上都唔敢落，至於喺樓梯口企緊更既大隻佬同四眼警察就處於警戒既狀態。
四眼警察望一望道鐵閘，再望一望啊樺。
啊樺舉舉手，同四眼警察話：「唔好郁，睇實個門口！」

啊樺再指指我同龍友話：「攝影師，你同啊麟上去用相機睇下見唔見到發生咩事。啊金毛條鎖匙呢？」

「下……哦！」MK仔嚇到慌慌張張咁搜搵全身，先至搵到條閘門鎖匙交左比啊樺。





啊樺走左去同四眼警察兩個一齊睇實個門口，而我同龍友即刻狗衝上去二樓。

一上到去，援交妹同OL就衝過嚟問「咩事啊？咩事啊？」

我推開佢地求其講左句「我都唔知，衣加睇。」打發佢地，就衝左去拎我自己既相機。

我走近窗邊拎起部單反影落去道閘既位，但係好唔好彩個角度比冷氣機同招牌擋住左咩唔到。
我望望龍友，睇下佢果邊情況點，佢只係擰擰頭回應我……
我決定先睇下條街睇下有無可疑人物，可惜都係得小貓三四隻，再用相機一一對照過，無一個係西裝佬。
我再喺窗邊徘徊，終於搵到個位，勉強望到下面。






係一對情侶……


個女既踎左喺道閘前面，而個男既就一直企喺個女前面來回度步。
我用相機影一影個男既，係有出現喺相入面，但係因為比塊玻璃頂住左，所以影唔到。
我同龍友講：「我見到啦，應該係情侶打交，不過我影唔到個女既。」
其他人聽到都鬆左口氣，我就走左落去搵番啊樺，同佢報告。
佢點點頭就同MK仔走番上嚟。

經過一輪鐵閘驚雲之後，大家再次冷靜番，而討論既人數由九個變到得番八個。

啊樺：「金毛你去睇住果Pair情侶，等佢地走既時侯再影一影佢地，確認下佢地係咪西裝佬。」





「下……哦。」MK仔口噏噏咁甚有怨言，不過啊樺叫到佢都無得say no，唯有死死地氣咁去左監視窗邊既狀況。

啊樺客套咁講：「唔該晒。By the way，你住邊？」

MK仔帶點悔氣話：「觀塘啊。」

援交妹見MK仔咁灰，於是講左句：「我住深水埗。」就跟左MK仔去喺窗邊情話綿綿。
但係無人阻止佢咁做，可能覺得援交妹一直都小出聲，又比唔到幾多意見，所以都由得佢。

運動姐姐就接住答：「我住香港仔果邊。」
港女OL：「我住灣仔。」
龍友：「我屯門。」

當我正想答果陣，我醒起頭先啊樺為左唔比人懷疑特登揀最後先答，所以我瞪大隻眼問啊樺：「你呢？」





啊樺應該sense到我既意思，特登大大聲咁答我：「我上水既。」

我再答：「我元朗丁丁。」

到最後係Major Tom：「我係葵涌。」

當啊樺抄低晒所有人既住址之後，佢有一個結論：「我地好唔好彩地，無人係住同一區既，都意味住我地可以去既地方得番好小，最近既應該係數到去荃灣。」

一講到荃灣，我即刻諗起Happy，我話：「唔得！我女朋友住荃灣。」

啊樺：「如果係咁……就要去到離島，西貢，又或者中環果邊。」

港女OL：「Well，咁去中環啦。」

運動姐姐：「咁我地要點去？巴士？小巴？」





啊樺即刻ban左運動姐姐既橋：「唔得，巴士同小巴太危險。車上面一來多人，二來，只要班西裝佬一上車，我地就無得走。」

港女OL：「車……唔通跑過去咩。」

啊樺比港女OL疾一疾搞到又無聲出，衣個時侯運動姐姐：「咁單車啦？」

龍友啪一啪手指：「喂！ok wo！就單車啦。不過踩咁遠……」

運動姐姐：「你又岩，所以我覺得荃灣可以一博。若然佢地同我地一樣其他人係見唔到既話，應該唔會問到我地人際關係上既資料。」

運動姐姐衣一下推理，又令我大開眼界，世估唔到一直唔出聲既佢都係深藏不露。
作為男人既我不禁自卑，點解次次主導推理既都係女人，唉！

啊樺：「但係佢地又知道金毛邊到做bo。」





運動姐姐又一下子解釋唔到，衣個時侯Major Tom：「我諗佢地係班好勁既黑客，應該Hack過大家既電腦，所以查到大家一啲比較表面既資料。」

啊樺望一望我：「你同你女朋友有無相之類留左喺電腦？」

我擰擰頭：「無，我同佢小影相，影親都係用手機，所以無留低，就連Facebook之類既野都無野show到我地係情侶。」

啊樺：「咁得啦，我地聽日去搵單車，轉去荃灣。」

運動姐姐：「未得住，Major Tom佢既傷勢都係可以勉強行到，但係要踏單車同跑都仲係未得，比多兩日既時間啦。」

Major Tom苦笑左下：「唔好意思啊，大家」

啊樺望望Major Tom都無聲好出，但係我估到佢個心肯定係覺得如果咁樣拋低Major Tom，以後唔會再有人聽佢支笛，所以會留低陪佢。

啊樺：「如果係咁，我諗之後果兩日都要大家分工去輪更守下面同睇水。每更兩個鐘啦，個更表我編一編先，大家休息下啦。」

經啊樺宣報完後，第一日消失日，都總算過左去……