[2/3/2015 08:44] 

我拎起相機,影住街外面既人,除左有兩個西裝佬靠近我地之外,仲有四個一早偽裝成途人既西裝佬由街頭走近Starbucks。
但係間Starbucks仲未到營業時間,鐵閘依然上鎖,希望可以頂到一陣子。
「係西裝佬佢地!」我大叫。

其他人一聽到我講既野就開始有啲驚徨失措,特別係MK仔佢甚至驚到同援交妹一齊大叫。
港女OL即刻執起佢枱面既野,準備走佬。
唔舒服既啊樺都被迫勉強企起身,走過嚟一齊睇水。
而相對上冷靜既四眼警察走左去另一邊窗睇一睇話:「我衣邊都有四個偽裝過既行緊過嚟!」





啊樺諗左諗:「我地去始創中心果到人流夠小,要走都有好多辦法。佢地太多人,我地分開走……」

運動姐姐露出一種質疑既眼神望住啊樺反駁:「得啦,我地唔會去始創。岩岩你對奇哥既做法,我地見到晒。我唔會再信你!」

啊樺:「我……」

佢正想解釋果陣,企喺運動姐姐則邊既Major Tom:「我都唔會信你,我覺得你會拋低我,就好似你對啊奇咁。」

大隻佬下意識走埋去運動姐姐到:「你太冷血啦。」





港女OL「摺」左聲表示同意。

望住啊樺咁既情況,我諗佢都知單單龍友既野佢自己已經失左勢,我諗我唯一可以做既就係幫佢解一解圍:「今次我都唔幫你,但係大家有咩建議?」

運動姐姐:「去現時點,果到人流極小,同埋我知道果到附近有間單車鋪,你地快啲拎曬腳架同相機,我地後門一齊走人。」

「砰!」

「砰!」





「砰!」

說時遲那時快,運動姐姐一落完指示,樓下已經傳出拍閘聲,睇嚟西裝佬已經到左!
啊樺佢無理到我地,自己一支公衝左落去。
運動姐姐望一望我話:「你去睇實佢!」
我即刻追住啊樺跟佢落左去一樓,啊樺佢無理到我自己一條友走埋去龍友條屍到不停摸。
我:「你想點啊!走啦!」
啊樺無出聲,繼續搵。
而我就拎實個相機對住樓下個閘門隨時戒備。

「砰!」

西裝佬好大力咁拍門,而心底果陣恐懼感開始上升……





「砰!」

我隻腳開始發軟,我望望啊樺,希望佢快啲走……

「砰!」

FUCK!我想走啊!

「砰!」

西裝佬打爛左對門,我已經見到佢地隻腳伸左入嚟。
我用相機影住個門口空空如也,但係大大個電單車頭盔一早望住我,而我同佢既視線接上左。
西裝佬一見到我就露出佢地把刀,由樓梯衝上嚟。
我好想拔腿而跑,但係隻腳就偏偏使唔出力……





「砰」一聲,一張木櫈由我身邊揮下,擊落西裝佬到。
雖然張木櫈無爛到,但係就令到西裝佬向後跌。
啊樺一手拉住我衝番上二樓……