[劇毒]自從裝左小熊來電之後……我部電話就無響過……: 22

[2/3/2015 08:57]

「走啊！」啊樺一手拉實我右臂，帶我一齊跑上二樓。
果兩個西裝佬好快就企番起身，佢地拎住把武士刀衝緊上嚟。

「喂！衣到啊！」大隻佬拎住把掃把喺逃生門果邊等緊我地。

我一路狂奔向大隻佬果邊一路大叫：「走啊！佢地殺到入嚟啦！」

大隻佬不停向我地招手：「我地知啊！佢地喺下面等緊我地，睇住地下啊！」





比大隻佬一提，我先發現二樓店面比起之前亂左好多，多左好多雜物喺地下，有啲書架又跌左落地，仲有啲枱都亂咁擇。
我同啊樺一路跑，一路整跌啲櫈，等西裝佬佢地難追上我地。
但係佢地就好似拍戲啲特技人咁，喺啲枱上西左跳右跳，仲跑得快過我地。
我心知不妙，放棄左去搞啲櫈，索性向住逃生門跑。
但係西裝佬實左跑得太快，我地同佢地既距離就差一兩個身位。
西裝佬拎起把武走刀正想一揮斬落嚟！

但係大隻佬飛身走左出嚟，拎起把掃把一野扑落去佢地對腳到。
西裝佬即時失左重心，又跌多獲。




大隻佬，即刻跌低把掃把同我地走左入逃生門，唔理三七廿一不停跑。
但係一落到去條後巷，咩人都無……

「頂！唔好理咁多走先！」大隻佬望兩望見咩人都無，就求其搵左個方向帶我地走出後巷。

一行到後巷既盡口就係洗衣街，距離Starbucks門口幾個鋪位到。
我拎起部單反影一影周圍既環境，發現有三個偽裝過既西裝佬企左喺Starbucks門口。

「仲影！走啦！」大隻佬一手拉左我出條巷仔帶我走。





而果三個西裝佬就好似Major Tom描述咁變番做佢地既正身，向我地跑過嚟。
大隻佬跑在我同啊樺之前，帶住我地跑。
我地沿住洗衣街一直跑一直跑，再轉入奶路臣街，跑番出女人街。
但係街上面既人唔多，西裝佬追得愈嚟愈貼。
好彩女人街啲鋪頭開始開鋪，我地三個就喺啲鋪頭間穿穿插插，而西裝佬就比我地玩到傻左，我地去到山東街果十字位既時侯，佢地都唔見左。
最後我地幾個走番去行人專用區。

大隻佬指指百老匯附近既M記話：「入去。」


最後我地三個就坐左喺M記果個開放式廚房既地下，睇住啲人炸衣樣果樣。

我深呼吸左一大口氣，對住啊樺大罵：「究竟你岩岩落去做咩啊！」

啊樺冷冷咁望左望我咩都無講，只係喺佢個袋到拎左舊錫紙出嚟。





我：「係啊奇既電話。」

啊樺依舊無出聲，只係點點頭。
望住佢默不出聲既樣，我就知道佢嬲緊，佢依然記住大家背叛佢既事……
我地三個就咁圍住做，但係無人再出聲，一股尷尬既氣氛充斥住大家。
即使平時啊樺做到幾無情，幾硬淨，佢都係女人，都係人。
受到大家既背叛，都係難受既。

大隻佬頂唔順果種氣氛，自己一個走左去counter到睇下出面既環境。
而我就走左去報紙架到，拎左幾份報紙睇嚟睇去。
比較大單既就係元朗反水貨行動，跟住啲題目都係咩十X歲青年強姦左十X歲少女啊，又或者某某科學家將晶片縮細左唔知幾多啊，再唔係某某醫生發現到新疾病，完全無咩消息係關於我地……

我睇睇下睇到悶又入番去搵啊樺，佢個樣望落都似係下左啖火。





我：「其實……你咁做……」

啊樺：「你地會咁做我明，但係我係清白。」

「我……唉……」雖然啊樺講得好真誠，但係我都係好難去信佢。

啊樺：「無所謂，你唔信我，但係幫一幫忙諗下，你部電話裝左個Apps之後，仲有無咩特別？」

我：「特別啊……有！佢不停強調三個英文字： DTA」

啊樺：「……果然！」

我：「下咩事？」

啊樺望望周邊見大隻佬未番，佢話：「我收到既係： 1SO。仲有我睇左龍友既電話係： ND6」





「咁我問下大隻……」當我正想企起身去搵大隻佬既時侯，啊樺捉實我隻手叫停左我。

啊樺擰擰頭：「我唔知佢信唔信得過……」

我：「點解？」

啊樺：「你有無諗過，其實我地咁多個入面，有機會係西裝佬扮既？」

比啊樺咁樣一點，我開始有懷疑……

啊樺再補充：「雖然我話過無所謂，但係今次我希望你會信我，得唔得？」

我諗左諗，的而且確啊樺救過我，唔會真係想害我，所以唔會係內鬼。





我：「好，但係你想點做。」

啊樺：「唔好咁快去同佢地會合，我知道咁做好危險，但係你諗下有咩理由班西裝佬會知我地喺邊？」

我無出聲只係點點頭。

啊樺：「我覺得……」

忽然之間，頭頂上既燈又再熄左，同時間M記變得灰暗，更重要既係除左啊樺同大隻佬其他人又再消失。
我：「又嚟啦！」

啊樺：「我睇到。」

大隻佬：「唔好亂咁走，我地太小人！」

如是者過左良久，但係電力依然未回復，其他人都未出現番，M記依舊一片紛暗。
啊樺無啦啦大叫：「啊！」