[劇毒]自從裝左小熊來電之後……我部電話就無響過……: 45

[3/3/2015 18:57]

已經去到六點就七點，但係Major Tom依然無出現過，而閘外面就依然有西裝佬行嚟行去。
就我過去果幾個鐘觀察，西裝佬既數目根本唔止得六個人咁少，至少都有十一二個，或以上。
望住咁多西裝佬既出現，令我對現況更加諗唔透。 

若然有咁多西裝佬同黨，點解又要依加先困住我地，早早捉住我地咪得。
而且大量面裝佬既出現都表示Major tom一開始就唔洗大我地。

除非啲西裝佬係假既，但係又唔合理，因為四點果陣先有西裝佬送過野食比我地。




正當我仲苦惱緊既時侯，Major Tom走番出嚟，佢用放棄左西裝佬既裝束，以Major Tom既姿態走到閘門前。
佢拉高小小道閘，喺條罅到，拋左幾係索帶入嚟話：「你地幫對方帶起佢。」

當然我地邊有人咁傻會照佢咁做，但係佢喺腰間露一露左支警槍出嚟，我地都無辦法唔聽話。

佢見我地都帶好晒就真真正正走入嚟：「邊個想番去先？」

不過我地五個都無出聲，就連一向比較無腦既港女OL都對佢講既野半信半疑。

Major Tom見我地五個都無出聲，所以佢走左去啊樺身邊話：「咁就你先。」





啊樺正想起身反抗，但係Major Tom 又再拎左支警槍出嚟，指住啊樺個頭話：「唔好亂郁，我真係幫你地，我諗你都唔想真係死架？」

Major Tom依句「真係死」的確太有威力，搞到我地四個都唔敢郁。
睇嚟我地既推斷無錯，唯有Major Tom先有方法幫到我地番去。

Major Tom喺佢件風褸到拎左支針筒，入面盛有啲藍色既液體。
佢一手就將啊樺撳落地下，搞到啊樺郁都郁唔到，佢兩隻眼望實我地，向我地發出求救既訊號。
依個時侯，雙手鎖上手銬既大隻佬正想起身上前反抗，但係Major Tom比佢快一步。
「砰」一聲開左果支本來屬於Stephen既警槍，射穿左大隻佬既左肩。




大隻佬即時失去反抗之力。
依一槍完全表示我地大勢已去，而且好有可能我地真係會死，所以借問邊個會咁勇敢去反抗？

Major Tom重申：「我講過我真係幫你地，我都唔想由幫你地變殺你地。」

一向都叫堅強既啊樺心知無希望，終於落淚。
但係Major Tom懶理啊樺既哭聲，喺佢手臂上面將啲藍色液體打入去。
我地四個就眼白白睇住啊樺送死……
Major Tom起番身離開，而啊樺就一直訓喺地到一直喊一直喊……


啊樺……唉……對唔住……


我好想好想掩住耳仔，唔想去聽佢既哭聲，但係我既雙手被索帶綁住。




我更加唔敢直視啊樺，只夠膽望住個地下，去逃避果種罪疚感。
可以走到今日係因為啊樺，唔係佢出咁多計仔，我地都唔會逃過一劫 ，如今我就咩都無做。
我心入面只係希望，Major Tom講既係真話，果支針真係可以令我地番番去原本既世界。