《香港傭兵》: [Day 01－平凡港人] PART 01
夜空明月下，坐上由荃灣開往屯門嘅60M尾班車。
坐喺上層嘅我，就只有坐喺車頭嘅醉酒漢相伴。
望住車窗外嘅夜景，寂寞夜裡我不寂寞。因為…
“And you don't seem to understand”
電話響…
拎部電話出嚟睇一睇，發光嘅螢幕裡顯示緊嘅正正就係我嘅最愛…阿月。
阿月呢張莞爾一笑樣，幾時睇都係咁靚...咁迷人。
滑動解鎖後：『喂～仲未瞓吖？』
「未吖～你都未返，我又點捨得瞓？」電話聽筒傳嚟嬌俏嘅聲音。
『哦～係吖…係吖…』做乜鬼？無啦啦扮乜鬼嘢嬌俏？一定有陰毛！
「點吖點吖？係唔係過咗小欖喇？」阿月古古惑惑咁問。
『過咗喇，啱啱過咗。你又知我過咗小欖嘅？』做乜無啦啦咁問？總係有種不安嘅預感…
「嘿嘿…因為我頭先打過俾你唔通囉～就估到你頭先喺小欖喇～我係唔係好醒呢？」阿月又扮晒叻叻豬咁。
『係喇係喇～醒喇醒喇～』講起又真係奇怪。
唔知出入屯門嘅你有冇發現，當巴士路經小欖嘅時候，總係收唔到電話㗎呢？
或者只係我用緊嘅電訊商廢掛…
「啱喇啱喇～我哋去食糖水咯～」阿月勁雀躍咁。
『哦！你打嚟係想叫我陪你食糖水！』我就話阿月一定有陰毛㗎啦！
「食糖水唔好咩？夜麻麻嘅炎夏就梗係食凍冰冰嘅糖水㗎啦～唔係點瞓得著～」阿月講到理所當然咁！
『月月娘娘…奴才連續兩個禮拜OT都冇乜點瞓過…你就俾我抖抖啦…』搵食真係好辛苦㗎…
「我就係知你辛苦～所以先想同你去食吓糖水開心吓吖嘛～你唔係咁都要辜負我嘅一番心意嘛？好啦好啦…一齊食啦…一齊食啦…」阿月又要扮晒可憐咁嘅口吻嗲吓我…
『呃…好啦好啦…食啦食啦…』我真係冇佢辦法…
只要阿月一扮可憐…嗲吓我…我個心都軟埋…
「嘿嘿嘿...咁你差唔多到時光隧道我就落樓啦～」
『我差唔多到㗎喇喎。』
「嘩！咁快嘅？！咁我而家準備吓先～你唔好一收咗線就瞓著吖！」
『咁短路程唔會啦。』
「嘩～好難講！你知你㗎啦，身處何地都瞓得著！一陣又困喺巴士內！」
『身處何地都瞓得著嗰個係你囉好唔好…』
「成日瞓到困喺巴士內嗰個係你囉好唔好！」
『係喇係喇…你仲唔快啲去準備？想我等你幾耐吖？』
「好喇好喇～而家去喇～一陣見啦～」
『嗯～拜。』
「拜～」
時光隧道…
所謂嘅時光隧道其實係隔音隧道。
一碌碌藍色嘅鐵架中間鑲嵌一塊塊隔音玻璃，驟眼睇真係好似科幻小說裡面所描寫嘅，可以穿梭過去未來嘅時光隧道。
細細個搭巴士穿過嘅時候，都總會FF一穿出去就去咗未來，又或者回到過去。
大個咗坐巴士返工放工，唔係瞓，就係瞓到流晒口水，仲點會留意出面係過去定係未來？
而家又望住遠處嘅“時光隧道”…越嚟越近…快要進入…進入時光隧道嘅入口…
就喺坐緊嘅60M駛進時光隧道呢一剎那…眼前嘅景象有啲異常…
好似…停頓咗…所有嘢…都停頓咗…
空間都好似…靜止咗…
眼見醉酒漢嘅位置開始扭曲…產生出黑色嘅…深淵一樣黑嘅…黑洞…
越嚟越黑…眼前一切…整個空間…正被深淵一樣黑嘅黑洞吞噬…
吞噬…
…
..
.
..
…
當我再睜開雙眼…
「立即運走佢！撤離呢區！」
我感覺到自己…瞓咗喺度…
「心跳跌緊！脈搏越嚟越弱！」
被推動緊…瞓咗喺度被推動緊…
「首先要維持佢嘅生命！」
眼前就只有…白茫茫一片…隱約仲見到有幾個黑影圍住自己…
「精神能量開始不穩。」
發生咩事？呢度係邊度？
我仲感覺到個身好似輕飄飄…
「唔得！靈魂開始飛散！」
越嚟越輕…飄到空中…
「制止佢。唔可以俾佢再有任何損傷。因為佢係…」
突然，眼前一片黑暗…
…
..
.
..
…
當我再次睜開雙眼…我望到嘅係…『夜空明月！』
我瞓咗喺…地上…望住黑色嘅夜空！雪亮嘅明月！
我再望望兩旁…殘舊嘅唐樓…
呢度係…
我坐一坐起身，再望清楚周圍…
坐喺…瀝青嘅馬路上…左右兩旁都有…商舖…
呢度係…
『旺角？！』我疑惑咁再望清楚四周…
呢度的確係旺角嘅西洋菜南街…行人專用區！
『點解…點解我會…』我起一起身…
呢度的確係旺角嘅行人專用區…但點解…平日People Come People Go People Mountain People Sea，而家就…一個人都冇？！
而且仲…
我行前幾步…再行多幾步…
有幾架爛車擺放喺路邊…
唔止咁…
仲有幾架著緊火！
兩旁嘅百老匯啲櫥窗仲要爛晒！一地都係玻璃碎！裡面啲貨都被人搶走晒咁！有啲舖頭仲著晒火！
『咩事呀？發生咗咩事呀？』呢度好似…打完仗咁…
火光熊熊咁…周地都有唔少雜物…紙碎...
點會…旺角點會…變咗戰場咁？！
我小心翼翼咁行多幾步，一邊大嗌：『有冇人呀？喂喂！有冇人呀？』
喺呢啲時候，我絕對唔會智障咁走去認為係唔知邊間電視台搞嘅真人Show！（試問而家香港仲有電視台會搞咁大壇嘢咩？）
我只係希望…可以有個人話我聽呢度發生咗咩事。
我一邊喺呢個戰後嘅旺角行吓行吓…
『有冇人呀？有冇人未死呀？Everybody here？未死出嚟應吓我呀唔該…』一邊大嗌希望得到回應。
之但係，附近除咗著緊火嘅爛車雜物，就係燒到黑晒成舊炭咁嘅爛車雜物。
煙灰喺空氣中飛揚…成條街都充斥着濃烈嘅燒焦味…
對於一個安逸慣嘅港人嚟講，而家就真係…真真正正感受到咩叫做烽煙四起。
睇嚟…除咗唔知點解無啦啦出現喺呢個戰區嘅我之外，再冇其他人。
或者行遠啲…再行多幾條街…睇吓會唔會正常啲。
咁…應該向邊個方向行好呢？尖沙咀？太子？
正當我仲諗緊向尖沙咀方向行好定太子好之時…
“咯 咯”
我聽到背後傳嚟…腳步聲？
“咯 咯”
係腳步聲…的確係腳步聲！
有人吖…有人呀！
當我好興奮咁轉身一望…望到身後企咗個…
『咩…咩嚟？！』我由興奮變得驚訝！
我面前嘅係…一部白色嘅…機械人？！
冇錯…面前正正就企咗一部外表白白銀銀…中間有一個拳頭咁大嘅圓形物體，發出紅色光，向纖幼嘅四肢及頭部流動…閃爍閃爍…似流水…似心跳...
全身以金屬、陶瓷、塑膠咁嘅質料製造...
至於頭部…頭部用上白色倒三角金屬面罩！
面罩表面仲好似有一層薄薄嘅...淡淡咁嘅…紅光...
一直望住我…雖然面罩上冇鏡頭，但我都可以好肯定咁話佢係望緊我！
另外我仲可以好肯定…呢部係機械人，而唔係好似Iron Man嗰種穿著式裝甲！
因為肉眼所見，整體都比較瘦削，冇可能藏到一個人！
『撞咩鬼…點會有啲…』當我都仲未講完想講嘅嘢之時…
“嗡！”
白色機械人喺腰間拔咗把…日本刀出嚟！
日本刀刃仲要發出紅光！好似激光刀刃咁！
『做…咩…做咩？等等先...喂！等等先！』仆街喇呢次…
就咁睇都知唔多對路…
“咯 咯”機械人行前兩步…
『喂！等等！好喇！夠喇！』我又退後兩步…
“咯 咯 咯 咯”機械人雙手拎住日本刀，向我迫近！
『仆…仆街喇呢次！』我立即轉身跑！
“咯 咯 咯 咯 咯 咯”我聽到背後傳嚟急速嘅腳步聲！
一邊跑，一邊回頭望一眼…
“咯 咯 咯 咯 咯 咯”
望到機械人跑得勁快咁追上嚟！
『好喇！夠喇！玩夠喇！工作人員呢？！好停喇喂！』我一邊跑，一邊大嗌！
痴咩線呀？！使唔使玩到咁大呀？！好撚驚嚇喇DLLM！！！
沿住條西洋菜南街向住家樂坊方向喪跑！
喺火光熊熊嘅行人專用區極速狂奔，我已經跑得勁快！
“咯 咯 咯 咯咯咯咯咯！”
但後面部機械人跑得更快！
痴線㗎…痴線㗎！痴咩線呀？！
我跑到兩架著緊火嘅爛車前，輕輕一跳！跳上車頭！跳過去！
完美落地再Keep住跑！回頭望一望…
“嗡！ 嗡 嗡！砰嘭！”部機械人將兩架著晒火嘅爛車都斬成碎件！
唔係講笑…真係唔係講笑…俾佢追到…真係會變碎件！
繼續跑！已經唔敢再擰轉頭！
“咯咯咯咯咯！！”
只係聽住背後嘅腳步聲咁奮力向前跑！
“咯咯咯咯咯咯咯！！！”
越嚟越近…越嚟越近…腳步聲越嚟越近！
『仆街喇…仆街喇…仆街…哎呀！』我真係仆低咗！
“咯咯！咯…咯…”
我回身一望…望到部機械人已經跑到嚟面前！
『唔好…唔好…』我一路向後爬…一路向住部機械人Fing晒手咁！
但係部機械人好似聽唔明我講乜咁…
『唔好…唔好…放過我…放過我呀！』望住機械人雙手舉起把日本刀，我淨係識得嗌唔好同放過我！
縱使我已經用上人類最直接嘅言語去表達，但機械人就好似只識得機械語言一樣，無視我嘅苦苦哀求…
當機器人將把日本刀舉到最高，要向我使出袈裟斬之時…
『唔好…唔好！』眼前嘅一切開始變慢…
發出紅色光芒嘅刀刃直砍落嚟嘅速度都慢起嚟…停落嚟…
接著…就係…我隻手…同刃刀之間嘅位置開始扭曲…
不停扭曲…扭曲…產生出黑色嘅…深淵一樣黑嘅…黑洞…
越嚟越黑…眼前一切…整個空間…正被深淵一樣黑嘅黑洞吞噬…
吞噬…
…
..
.
..
…
當我再次睜開雙眼…
『嘩！』好刺眼！
我雙眼半開半合咁再睇一睇…
係…LED白光燈？！
呢度係邊度？點解我又會瞓咗喺度？
我瞓咗喺張…鐵板？
背後涼涼地咁…手腳…條頸！全身都鎖喺張鐵板床上！
咩事呀？！做乜鎖住我呀？！呢度又係邊度呀？！
我再望一望…鐵板床係白色…白色金屬？陶瓷？
再望望地下…都係好刺眼！LED白光燈？！
呢度係天堂？定係地獄？
『喂！有冇人呀？我醒咗喇喂！可以放我走喇！』我大嗌幾聲！個頭都唔係好郁到！
做乜嘢呀？解剖外星人呀？一陣唔會真係有外星人嚟解剖我吖化？！
『喂喂～人嚟呀～放我走啦～我冇錢又唔靚仔…鎖住我都冇用㗎！你去捉李加乘啦！』屌…真係痴線…
你話我係有錢人就話姐…
我又未有錢過…又唔係天才…
平凡港人如我，路過十個似我，都要俾人捉嚟啲唔知乜鬼嘅地方。
你俾我返去瞓啦！聽日仲要準時起身返工㗎仆街！
『喂喂…喂喂喂…』我冇氣冇力咁喂多幾聲…
“吱”我聽到…開門聲？
“咯 咯 咯 洛”然後係…腳步聲…
同時間，張鐵板床都有所動靜…開始升直…
『好咯好咯…終於都…』當張鐵板床升到差唔多四十五度之時，見到…一個…女仔行緊過嚟…
呢個女仔…留有長長既黑長髮…斜陰…
眼大大嘴細細面尖尖咁幾靚女…皮膚仲要勁白…
高挑瘦削嘅身材…著住…著住黑色長袍？！
呢個女仔身上…著住件束腰嘅黑色長袍…所以先睇得出佢高挑瘦削。
望真啲，黑色長袍仲繡有黑色暗花。
純黑襯黑看不見但卻誘惑？！
就咁睇呢個女仔…大約都係十六七歲咁上下…
咁細個就學人綁架？！
劫色好喇～唔好劫財吖～
「終於醒喇咩？一部EVE UNIT就咁俾你摧毀咗…仲差啲吞噬埋成個訓練場…要用咁重嘅藥先撳得住…唉～不穩定因素實在太多...睇嚟真係要再好好評估先得喇～」個靚女擰吓擰吓頭咁。
『講咩吖靚女～咪玩啦～放咗我先啦～我唔好SM㗎～』我想郁吓手手腳腳，但因為真係鎖得太實，郁都郁唔到。
「邊個同你玩吖？」個靚女突然好認真咁！
『呃…做乜捉我嚟呢度？點錯相喇吓話？我普通人嚟㗎咋～冇野俾到你哋㗎～放咗我先啦～』仲話唔係玩？擺明玩認真啦～
「普通人？哈～你一啲都唔普通…你係…我哋嘅人～」靚女帶住充滿陰謀嘅微笑…
『我…我係你哋嘅人？即係咩人？』
「SPIRIT…傭兵。」
『SPIRIT…』傭兵？！