離遠望住圍牆行過去…

『係屯門警署…』

一步一步行近,離遠就已經望到警署嘅圍牆牆身有一個個…大窿…

有啲乜嘢可以打穿厚厚嘅圍牆?

我行近牆身,睇清楚缺口嘅周圍…邊位…



『有燒焦嘅痕跡…』我摸一摸牆身嘅缺口…

可以令石屎牆燒焦…唔會係…火箭炮掛?

的確,呢種燒焦嘅痕跡應該就只有火箭炮先做得到。

但你又點聯想得到,香港會有火箭炮出現?

沿住圍牆行…牆身除咗有被火箭炮炸開嘅缺口外,仲有唔少子彈窿。



『照咁睇…警署曾經被圍…係咩人做?係…西貢獻命?』我一邊摸住圍牆行,一邊諗。

真係想像唔到,香港都有官迫民反嘅一日。

但點解偏偏係…西貢獻命?

行到嚟閘門…鐵閘早已被撞爛。

我探頭望一望入去…



裡面都幾亂吓…

就咁望都望到有幾架燒焦咗嘅警車殘骸。

我行入幾步,再小心謹慎咁行多幾步…

“咔…啪…”地上都有唔少玻璃碎。

仲有啲爛鐵啦…又有幾架燒焦咗嘅警車殘骸啦…幾架溶溶爛爛甩皮甩骨嘅鐵馬啦…仲有架…裝甲車添。

『係警察嘅裝甲車?』我望望裝甲車車身,確有警隊嘅徽記。

我再抬頭望望警署大樓…玻璃窗都碎晒…又有被火箭炮炸開嘅大窿…仲又有唔少樓層有燒過嘅痕跡…甚至倒塌。

一片頹門敗瓦…



睇嚟…呢度嘅戰況都幾激烈。

四方八面來襲…警方只有死守…

炸開圍牆…撞爛鐵閘…攻入警署大樓…

呢種情況…係騷亂?暴亂?暴動?定抑或係…革命?

我再左望望,右望望,望多幾望…入唔入去睇吓好呢?

但座大樓…都變咗危樓…好有倒塌嘅危機喎!

之但係…我又好好奇…



警署被攻陷,真係FF都冇FF過…

外面都咁激烈…裡面唔知會係點呢?

『唔…』我諗小心啲嘅話…應該冇事嘅~

好啦~去探吓險啦~

就喺我向住破爛嘅閘門行過去之時…

我見到有個黑影…由黑暗嘅大堂行出嚟!

「走!走呀!走!」一個衣衫襤褸,留有長長白髮白鬍鬚嘅…露宿者趕我走!

原來…原來有人㗎?



「走呀!我叫你走呀!」

望清楚啲…個露宿者仲拎住把…開山刀!

露宿者搖吓搖吓把開山刀,越行越近咁!

『嘩…嘩!對唔住!對唔住!』我立即轉身跑返出警署!

跑呀跑呀跑!

真係估唔到…會有人喺裡面!

更估唔到嘅係,警署被丐幫佔領!



係咯!竟然有人,但點解唔係西貢獻命班人呢?

當頭先有黑影出現時,我嘅腦海第一時間就閃出光頭佬!

但實際出現嘅係露宿者!

點解呢?點解有咁好嘅地方都唔用呢?

定係佢哋有更好嘅地方…

我跑多幾步,跑離警署一大段距離後,就停落嚟…

『嗄…嗄…更好嘅…地方…』

或者有更好嘅地方…就例如…私樓…

的確,搵個有會所嘅私樓做基地仲好。

屯門都算有唔少私樓,有停車場,會所仲要幾大,用嚟落腳真係一流。

唔怪得街上仲會有咁多露宿者!

咁講法…西貢獻命嘅人數都唔少…

而家都係唔好理西貢獻命班人咁多!首先掃描咗呢區先!

我就開始行。行過兩條街就拎部電話出嚟睇睇先…

行過嘅地方都紅晒!而家行緊嘅又啱啱好覆蓋到!

『好!就係咁Keep住掃!』

我就繼續每隔兩條街S字型咁掃!

沿途都見到唔少衣衫單薄嘅工人上落貨。

又有唔少大中輕型貨車擦身而過!沙塵滾滾!

『咳咳!屌!』仲要被啲沙石彈到!

睇嚟都係要小心啲!

尤其喺馬路邊!一陣個司機香港腳發作鏟咗過嚟,我就咁收皮!

除咗路上嘅大中輕型貨車外,當然仲要小心西貢獻命!

一路上,我都留意住有冇西貢獻命嘅蹤影!

而當西貢獻命嘅人喺對面街出現又好,迎面行緊過嚟都好,我都總會耷低頭…一心諗住“你睇我唔到…你睇我唔到…你睇我唔到…你睇我唔到…”…

又好好彩佢哋又真係好似睇我唔到咁!

有驚冇險咁每隔兩條街S字型行,終於俾我行到嚟目的地。

行到入嚟工廠大廈,工人都唔係好理我,繼續佢哋落貨搬貨運貨。

我就行到去客𨋢…兩部都壞嘅!好彩仲有一部用到~

不過又係囉!震吓震吓咁升上去!分分鐘都會跌返落去咁!

不過好彩…今次都係上三樓姐~

“咔…咔…啪!”上到嚟就搵搵…

「睇撚住呀!」被個推住車貨嘅工人撞到!

『Sor…Sorry…』屌!好撚痛囉!

「盲閪嚟!」

屌!呢度又黑又暗咁睇撚到咩?

『嘩!好撚痛…好撚痛…』咁樣兜嘢車埋嚟真係痛撚死!

我就忍住痛咁繼續喺呢個陰暗嘅走廊邊行邊搵!

『高高貨運…高高貨運…』呢度都有好多公司…不過都係閂晒門…落晒閘…

間間都好似唔見得光咁…

又有啲工人托住一包二包咁出出入入。

好似係…食物?

光源唔夠充足,睇得唔係好清楚。

只係睇到…有個工人托住五六包米咁行。

又有幾個工人托住幾桶…蒸餾水?

裡面係唔係載蒸餾水就真係唔知喇~

不過就咁睇…大多數都係食品飲品咁囉。

我就繼續行,繼續搵。

有好多號碼都甩晒色…行吓行吓又要行返轉頭!

喺殘舊陰暗嘅工廠大廈兜咗好多轉…

『高高貨運…高高貨運!係呢度喇!』終於都俾我搵到你喇!

行到嚟高高貨運,鐵閘同大門都已經打開。

唔單止咁,我仲聽到…

「係唔係唔撚俾呀?!」

我仲聽到裡面…好似…

「唔係唔係…咁我真係冇…」

爭吵緊?

「咁即係唔撚俾啦!」

的確係爭吵緊咁!

我就八八卦卦,探頭入去望一望…

「我月頭已經俾晒你哋…真係再冇錢俾喇…」我見到一個戴眼鏡嘅…中年阿叔…

「冇錢俾咪俾貨囉。」被兩個光頭大隻佬夾住!

又係老是常出現嘅西貢獻命…真係去到邊都遇到佢哋!

我一早就估到!就喺門外聽到有爭吵聲之時!

唔使問都知,一定又係嚟收保護費!

「唔得㗎!唔得㗎!啲貨係啲客㗎!唔俾得你哋㗎!」個四眼中年阿叔以身護住啲貨!

睇嚟呢個阿叔就係呢度嘅老闆。

「而家係啲客重要啲?定係…我哋重要啲呀?!」其中一個西貢獻命嘅光頭佬就一手捉住阿叔,一個右直拳打落阿叔塊面度!

「嗚呀!」阿叔兜口兜面食到應一應!眼鏡都爆埋!

「睇嚟係啲貨重要過你條命喎!」另一個西貢獻命嘅光頭佬又一腳踩落阿叔個肚!

「嗚!唔好…呀!」阿叔就被兩個西貢獻命嘅人撳住喺地拳打腳踢!

望到呢種情境…呢種情況…強權壓迫弱勢…

「吓?咩話?唔咩好話?!」

睇到我緊握拳頭…

「唔好…呀!呀!唔好打…呀!呀!」

睇到我扯晒火!

正當我扯晒火!但又唔知應該可以點做之時…

「我俾…我俾喇!唔好再打喇!」阿叔最終屈服…

又係屈服喺強權之下…

兩個西貢獻命嘅人停咗手之後,阿叔就爬過去…爬過去拎…錢…

阿叔拎咗錢之後,就爬到去兩個西貢獻命面前:「係得咁多㗎咋…冇㗎喇…冇㗎喇…」

西貢獻命接過阿叔手上啲錢:「真係冇?頭先你夠話冇啦!」

西貢獻命又大大力踢一腳落阿叔個肚!

「嗚呀!真係冇喇!今次真係乜都冇喇!」阿叔撳住個肚,跪喺西貢獻命面前!

「唉~早啲拎出嚟,咪唔使受皮肉之苦囉!下個月醒啲喇!」兩個西貢獻命數完錢之後就轉身走。

望住兩個西貢獻命越行越近…向住我身處嘅位置越行越近…

「望乜撚嘢呀望?!」仲要一句屌埋嚟!

我只好頭耷耷…讓條路俾佢哋走…

當兩個西貢獻命嘅人都離開之後…

『有冇事吖?』我走上前,扶起仲趴喺地上嘅阿叔。

「冇…冇…嘩呀呀!好痛…好痛!」阿叔除一除碎晒爛晒嘅眼鏡。

『坐…坐坐先!』我隨手拎張摺凳!

「好…好…」阿叔都未坐穩,又企返起身,「你係唔係嚟拎貨㗎?」

『你坐陣先…你坐陣先~唔使急~』我望住仲流緊鼻血…嘴角都仲有血流緊出嚟嘅阿叔…

「好…好…」阿叔用衫領抹一抹鼻血…牙血…又戴返副爛眼鏡…

我幫阿叔除返副爛眼鏡…放喺摺檯上。

望住阿叔震吓震吓…又擰擰頭咁…我都唔知可以做得啲乜…

陪住阿叔身邊…就只可以默不作聲咁陪住喺阿叔身邊…

「唔係咁㗎…以前唔係咁㗎…」阿叔震吓震吓…又擰擰頭。

唔係咁?以前唔係咁?

「以前…屯門常開管理…唔係咁㗎…」阿叔口噏噏,噏咗啲我聽唔明嘅嘢出嚟!

『屯門…常開…』係咩嚟?

「屯門常開…唔會收保護費…唔會…咳咳…咳咳咳!唔會打人…」阿叔邊咳邊講。

唔會收保護費?

好似西貢獻命咁…係組織?

「自屯門常開讓咗屯門出嚟俾西貢獻命,同天水圍城合併成為天門,喺元朗落腳,就俾西貢獻命搞到呢度民不聊生…」阿叔抖啖大氣,擰擰頭。

照咁睇…應該就係…

除咗西貢獻命,仲有屯門常開同天水圍城都係一啲組織…

呢啲組織係點成立?成立又有乜目的?

由呢區冇警察,同頭先路過被戰火洗禮過嘅警署推測,佢哋都係反政府組織!

仲要有軍火!

真係FF唔到香港咁細小嘅城市,都可以有武裝嘅反政府組織…仲要有三個咁多!

打咗幾耐?又可以打到幾耐?打唔夠一個禮拜,成個香港都變廢墟啦!

而點解…

『點解屯門…常開會讓咗屯門俾西貢獻命?』仲要走去元朗…同天水圍城合併…成為天門…

「天知道…」阿叔笑笑口,擰擰頭,「辛辛苦苦打個屯門返嚟,一聽到西貢獻命有難就接濟佢哋…仲雙手奉送屯門俾佢哋!真係唔知佢哋有乜關係…」

西貢獻命有難?

有乜難?

會唔會同綽姿口中嘅…西貢攻防戰有關?

「點都好啦…一切已成定局!」阿叔雙手拍拍大髀,摸一摸,望一望…整個貨倉,「已經遣散晒啲伙記…呢度好快都做唔住㗎喇…唔知有冇機會…走過去天門嗰邊呢…」

走過去天門嗰邊?

天門嗰邊又會係點?

會比呢度好?定係沒有最差,只有更差?

「點吖後生仔?係唔係嚟拎貨㗎?」阿叔起一起身。

『你可以再抖…』我都未將“抖先喎”講埋出口…

「得㗎喇~俾張單我~」阿叔起身鬆一鬆。

『哦…』我就交張單俾阿叔。

「哦?係當下咖啡店?未見過你嘅?」阿叔接過我手上張單之後,就行去…放滿貨嘅貨架…

『哦!係吖…我…新嚟嘅…』我就望住阿叔喺個貨架上搵吓搵。

「係?杜王土個孤寒鬼都肯請新人?真係一百歲唔死都有新聞~」阿叔再摷多幾摷…

嗯?Owner好孤寒㗎咩?

應該都係啦~

唔係雨姐開口,都冇五十蚊工資~

「嗱!就係呢箱喇!」阿叔由貨架拎咗一個…木箱過嚟!

個木箱雖然唔算太大…但睇起上嚟就幾重吓!

嘩!要我一個人拎咁重嘅木箱行返去…想攞我命咩?!